په پروان کې د نقاشۍ او خطاطۍ هنرمندانو لپاره درې ورځنی سیمینار پیل شو
په پروان ولایت کې د اطلاعاتو او کلتور ریاست له لوري د نقاشۍ او خطاطۍ د هنرمندانو د هڅونې او ملاتړ لپاره درې ورځنی سیمینار پیل شو.
په پیل کې د یاد ولایت د اطلاعاتو او کلتور رئيس مولوي شمس الرحمن صديقي د هنر د ارزښت او اهمیت په اړه خبرې وکړې او ويې ويل: هنر يو ځانګړى مهارت او فوق العاده کار دى، په هنري کارونو کې د قلم ارزښت د پام وړ دی، له ډېر پرمختګ سره سره بیا هم د خطاطۍ او نقاشۍ هنر خپل مينه وال لري.
نوموړي د خطاطۍ او نقاشۍ له هنرمندانو سره د اطلاعاتو او کلتور ریاست له لوري د هنر د ودې او د هېواد د اصلي کلتور د بنسټیز کولو په موخه د همکارۍ ډاډ ورکړ.
ورپسې د اطلاعاتو او کلتور رياست د هنري او کلتوري پروګرامونو مسؤل فرهاد احساس د هنر د نړيوالې ورځې په مناسبت د دغه سيمينار د پيلولو موخه د هنرمندانو هڅونه او ملاتړ وباله.
وروسته د دغه سیمینار عملي کار د پروان ولایت د مشهور انځورګر استاد فریدون فروتن له خوا پیل شو.
۱۴۴۵/۳/۲۴ هـ ق
۱۴۰۲/۷/۱۷ هـ ش
