زابل کې د رسنیو او مسؤلینو ترمنځ د همږغۍ ناسته ترسره شوه

د زابل ولایت د اطلاعاتو او کلتور ریاست په نوښت د رسنیو او مسؤلینو ترمنځ د همږغۍ ځانګړې ناسته د مرستیال والي مولوي محب الله حماس په مشرۍ ترسره شوه.
په دې ناسته کې د اطلاعاتو او کلتور ریاست رئیس مولوي رحمت الله حماد، د خبریالانو د خوندیتوب کمېټې ولایتي مسؤل عصمت الله عمري، د ملي راډیو تلویزیون آمر، د امنیه قوماندانۍ ویاند، د امربالمعروف او نهی عن المنکر استازی او ګڼ شمېر خبریالانو ګډون درلود.
د ناستې په پیل کې عصمت الله عمري وویل: چې تېره میاشت د رسنیو په برخه کې د لاسته راوړنو ډکه وه او هیڅ ډول منفي پېښه نه ده رامنځته شوې. نوموړي زیاته کړه؛ چې د مسؤلینو له خوا معلوماتو ته د لاسرسي اسانتیاوې برابرې شوې دي، چې له امله یې زابل ولایت د هېواد په کچه دوهم مقام خپل کړ.
د اطلاعاتو او کلتور ریاست رئیس مولوي رحمت الله حماد وویل: په زابل کې موجود خبریالان د نظام پالیسۍ ته ژمن دي او تل یې د نظام کړنې په ښه ډول انعکاس کړې دي.
د ناستې په وروستیو کې مرستیال والي ښاغلي حماس د خبریالانو هڅې وستایلې او له هغوی یې وغوښتل چې د نظام د کړنو او فعالیتونو د لا ښه انعکاس لپاره خپلې هڅې لا چټکې کړي.

۱۴۴۶/۵/۲۴ هـ ق
۱۴۰۳/۹/۶ هـ ل