د ګرځندوی، مالي او اداري چارو معین د جهادي ارزښتونو د ساتنې لوی ریاست څخه لیدنه وکړه
د اطلاعاتو او کلتور وزارت د ګرځندوی ،مالي او اداري چارو معین ښاغلي مولوي قدرت الله جمال د يوه پلاوي په ملتیا د جهادي ارزښتونو د ساتنې لوی ریاست څخه د ادارو ترمنځ د همغږۍ، همکارۍ او د مشترکو اهدافو د تحقق په موخه لیدنه وکړه.
په دې ناسته کې د جهادي ارزښتونو د عمومي ریاست رئیسانو، آمرینو او مسؤلینو ګډون درلود. دواړو لوریو د جهادي ارزښتونو د ساتنې او د ملي هویت د پیاوړتیا په برخه کې د دوامدارې همکارۍ پر اړتیا ټینګار وکړ.
د لیدنې په ترڅ کې ښاغلي جمال صاحب د جهادي ارزښتونو د ساتنې او مستندولو پر اهمیت خبرې وکړې او ویې ویل: دا ارزښتونه د هېواد د تاریخ، هویت او د اشغالګرو پر وړاندې د افغان غيور ملت د جهاد او مقاومت ښکاره بېلګې دي.
ښاغلي جمال صاحب د جهادي ارزښتونو د ساتنې لوی رياست مسؤلينو ته د تاريخي اسنادو د راټولولو او د جهادي موزيمونو د تنظيم په اړه يو لړ سپارښتنې وکړې او د هر ډول همکارۍ ژمنه يې ورسره وکړه.
۱۴۴۶/۱۲/۲۰ هـ ق
