د اطلاعاتو اوکلتور وزارت فرهنګي آتشې د روسیې فدراسیون د ملي اقتصاد د لاسته راوړنو په نندارتون کې ګډون وکړ
په مسکو – روسیه کې د ا. ا. ا. لوی سفارت کې د اطلاعاتو او کلتور وزارت فرهنګي آتشې فضل الهادي حمزه د روسیې فدراسیون د ملي اقتصاد د لاسته راوړنو په نندارتون کې د توریزم په پنځم نړیوال فورم کې ګډون ترسره کړ.
یاد نړیوال فورم د ګرځندوی (توریزم) صنعت لپاره د روان کال یو له مهمو فورمونو څخه دی، چې حکومت، سوداګر، متخصصین او سیاحین په یوه پلاتفورم کې سره یوځای کوي، دا فورم د روسکانګرېس بنسټ لخوا د روسیې فدراسیون د اقتصادي پراختیا وزارت سره یوځای د روسیې فدراسیون د حکومت او د مسکو د ګرځندوی کمېټې په ملاتړ تنظیم شوی و.
په یاد ګرځندوی فورم کې د سیاحت، ټکنالوژۍ او شته ننګونو په هکله اړین بحثونه وشول، چې د روسیې فدراسیون له ۸۵ څخه د زیاتو سیمو استازي، د بهرنیو هېوادونو پلاوي پکې شامل و، د یاد فورم په ترڅ کې د ګرځندوی اړوند مهم مسائل مطرح شول، چې د حل د لارو چارو ترڅنګ، د موضوع اړوند د ګډونوالو ترمنځ د اوږدې ملګرتیا او څو اړخیزه همکاریو په هکله وړاندیزونه او هوکړې ترسره شوې.
د ګرځندوی فورم په څنډه کې ښاغلي حمزه د روسيې د ګرځندوی ادارو استازو، بهرنيو ډيپلوماتانو او د بهرنیو کلتوري ادارو له استازو سره د افغانستان او نړۍ په روانو حالاتو د نظریاتو تبادله وکړه او د دوه اړخيزه ګرځندوی او کلتوري اړيکو د رامنځته کېدو لپاره يې خبرې وکړې.
۱۴۴۶/۱۲/۱۹ هـ ق
