جوزجان کې د (ګل لاله) په نوم مشاعره ترسره شوه
د جوزجان اطلاعاتو او کلتور ریاست له لوري د (ګل لاله) په نوم مشاعره ترسره شوه، چې پکې د جوزجان والي مولوي عبدالله سرحدي، د اطلاعاتو او کلتور وزارت د ترنم او ترانو رئیس مولوي امانالله مستغفر، د جوزجان او یو شمېر نورو ولایتونو د امارتي ادارو مسئولینو، د جوزجان، سرپل، بلخ، کابل، کندهار او ځینو نورو ولایتونو مجاهدینو، ترانه ویونکو، شاعرانو او لیکوالانو ګډون کړی و.
د جوزجان والي او د اطلاعاتو او کلتور وزارت د ترنم او ترانو رئیس په ټولنه کې د فرهنګي او ادبي پروګرامونو پر ارزښت ټینګار وکړ او دغه مشاعر یې د فکري ودې، د فرهنګي هویت د پیاوړتیا، د ځوانانو ترمنځ د سالم فکر رامنځته کولو او د علم زده کړې ته د هڅونې اغېزمنه وسیله وبلله.
ورته مهال د جوزجان د اطلاعاتو او کلتور رئیس د دې سترې مشاعرې د جوړولو موخه د شاعرانو او فرهنګیانو ملاتړ، د ځوانانو د استعدادونو د ودې لپاره زمینه برابرول، د فرهنګي روحیې پیاوړتیا او د هېواد د فرهنګیانو ترمنځ د همغږۍ لپاره ښه زمینه برابرول وبلل.
د دې مشاعرې په لړ کې ګڼ شمېر ترانه ویونکو، شاعرانو او لیکوالانو خپلې حماسي او وطن پالنې شعرونه، ترانې او لیکنې د بېلابېلو سرلیکونو لاندې ګډونوالو ته واورولې، چې د ګډونوالو له پراخ هرکلي سره مخ او د پام وړ وګرځیدل.
ګډونوالو دا پسرلنۍ مشاعره د فرهنګ او ادب د بیا راژوندي کولو، د یووالي روحیې د پیاوړتیا او د سالم فرهنګي چاپېریال د رامنځته کولو په برخه کې مهم ګام وباله او په راتلونکي کې یې د ورته سترو پروګرامونو د دوام غوښتنه وکړه.
۱۴۴۷/۱۱/۳ هـ ق
