سرپل کې د رسنيو له مسؤلينو او خبریالانو سره د همږغۍ غونډه جوړه شوه

د سرپل ولایت د اطلاعاتو او کلتور ریاست له لوري د دې ولایت د خبریالانو او رسنیو له مسؤلینو سره د همږغۍ غونډه د ياد رياست د رئيس ملا عبدالغفار حقنما په مشرۍ ترسره شوه، چې پکښې د ولايت مقام وياند د نورو امارتي ادارو وياندویانو، خبريالانو او درسنيو مسؤلينو ګډون کړی وو.
ملا عبدالغفار حقنما په خپلو خبرو کې په ټولنه کې د رسنیو پر ارزښتناکه رول ټینګار وکړ او د رسنیو له مسؤلینو او خبریالانو یې وغوښتل، چې د مسلکي اصولو په رعایت سره د ملت لاسته راوړنې او ستونزې په ښه توګه منعکس کړي، نوموړي زیاته کړه، د سرپل د اطلاعاتو او کلتور ریاست د خبریالانو او رسنیو لپاره د زیاتو اسانتیاوو برابرولو په موخه هڅې کوي او په دې برخه کې اغېزمن ګامونه پورته شوي دي.
د اطلاعاتو او کلتور ریاست د اطلاعاتو آمر ایام‌الدین یولداش د دې غونډې د جوړېدو موخه د رسنیزو فعالیتونو اړوند مسایلو ارزونه او د رسنیو او امارتي ادارو ترمنځ د همکارۍ پیاوړتیا وبلله.
خبریالانو او د رسنیو مسؤلینو په سرپل ولایت کې د دغسې غونډو جوړېدل د رسنیو د ملاتړ او رسنیزو چارو لپاره مهم وبلل او ويې ويل: چې دغه ډول غونډې کولای شي، د محلي ادارو او رسنیو ترمنځ د لا ډېرې همږغۍ زمینه برابره کړي او پر وخت او دقیق اطلاع‌ رسونې ته وده ورکړي.

۱۴۴۶/۶/۳۰ هـ ق
۱۴۰۳/۱۰/۱۲ هـ ل