پروان کې ځوانانو ته د لومړنیو مرستو ښوونیز پروګرام جوړ شو
د پروان ولایت د اطلاعاتو او کلتور ریاست د ځوانانو چارو آمریت له خوا د دې ولایت لسګونو ځوانانو ته د لومړنیو مرستو یو میاشتنی ښوونیز پروګرام جوړ شو.
د اطلاعاتو او کلتور رياست د اطلاعاتو آمر رحمت الله رحیمي د لومړنیو مرستو زده کړې پر اهمیت او اړتیا خبرې وکړې، نوموړي وویل: د اطلاعاتو او کلتور ریاست دا پروګرام د بېړنیو حالاتو لپاره د ځوانانو د روزنې او د زیانمنو کسانو د وضعیت د سم مدیریت لپاره پیل کړی دی.
نوموړي زیاته کړه؛ په دې پروګرام کې ځوانانو ته د طبي وسایلو او استعمال په اړه معلومات ورکول کېږي، چې په بېړنیو حالاتو کې د وقایې لپاره اړین دي.
د ځوانانو چارو د پروګرامونو د همغږۍ مدیر احمد جاوید پویش وویل: دا پروګرام د ځوانانو د هڅونې او ملاتړ لپاره جوړ شوی دی، هغه ډاډ ورکړ چې د اطلاعاتو او کلتور رياست به د داسې پروګرامونو له لارې د ځوانانو د ظرفیت لوړولو او ودې لپاره هڅې روانې وساتي.
دغه ښوونیز پروګرام د ځوانانو د مهارتونو زیاتولو او د بېړنیو حالاتو لپاره د هغوی د چمتووالي په موخه ترسره شوی دی.
۱۴۴۶/۶/۱۰ هـ ق
۱۴۰۳/۹/۲۲ هـ ل
