د هنر او کلتور معین د چین له مرستیال سفیر سره لیدنه وکړه
چهارشنبه مورخ (د اول ربیع الاول ۱۴۴۶) د اطلاعاتو کلتور وزارت د هنر او کلتور معین مولوي عتیق الله عزیزي نن په خپل کاري دفتر کې په کابل کې د چین ولسي جمهوریت سفارت له شارژدافیر (مرستیال سفیر باوو ژو هوی ) سره د دواړو هېوادنو تر منځ د فرهنګي اړیکو په تړاو ناسته وکړه.
ښاغلي هوی وویل: چین او افغانستان ګډ کلتوري مشترکات لري، د تاریخ په اوږدو کې يې ښه روابط پاللي او خوشحاله یو چې افغانان وروسته له ډیره وخته اوس په سوله او امنیت کې ژوند کوي.
ښاغلي هوی زياته کړه؛ چین غواړي د دغو دوه اړخیزه اړیکو د پیاوړتیا په پار خپل فرهنګي روابط لا زیات او پراخ کړي، په همدې خاطر په راتلونکې اونۍ کې د چین هېواد د لرغون پوهنې ادارې یو ګډ مسلکي هئیت افغانستان ته راځي، تر څو دلته د افغانستان د تاریخي آبدو، ملي موزیم او مس عینک کې د تاریخي اثارو په استحکام او ساتنه کې له افغان لرغون پوهانو سره ګډ کار وکړي او په خاص ډول د مس عینک پروژې ته چټکتیا ورکړي.
د هنر او کلتور معین مولوي عتیق الله عزیزي د چین هېواد د سفارت له مرستیال سفیر څخه مننه وکړه او زیاته یې کړه، افغانستان د تاریخي آبدو او اثارو له پلوه یوه غني هېواد دی، په دې برخه کې د چین همکاري او مرسته اړینه ده، تمه لرو چې د افغانستان ګڼې لرغونې سیمې او تاریخي آبدات د چین هیواد په مرسته ورغول شي، ځکه چین په دې برخه له مسلکي او فني اړخه لوړ ظرفیتونه او وړتیاوې لري.
ښاغلي عزیزي افغانستان ته د چینایي لرغون پوهانو راتګ مهم ګام وباله او ژمنه یې وکړه، چې دوی ته به لازمې اسانتیاوې برابروي او د اطلاعاتو او کلتور وزارت د لرغون پوهانو او متخصصینو د ګډ کاري پلاوي په ملتیا به دافغانستان په ګڼو تاریخي برخو د تحقیق او ارزونې د پام وړ لاسته راوړنې ولري.
۱۴۰۳/۶/۱۴ ھ ل
۲۰۲۴/۹/۴ ميلادي
