پروان کې د ځوانانو لپاره يو ورځنی علمي روزنيز سیمنار جوړ شو

سه شنبه (۳ محرم ۱۴۴۶) پروان ولايت کې د اطلاعاتو او کلتور رياست له لوري د پوهنې ریاست په همغږۍ د ځوانانو او د ښوونځيو زده‌کوونکو لپاره (د ځوانانو ويښتیا) تر سرليک لاندې یو ورځنی علمي روزنيز سیمنار جوړ شو.

د اطلاعاتو او کلتور رئیس مولوي شمس‌الرحمن صدیقي په خپلو خبرو کې د ياد سیمینار موخه د ځوانانو فکري سمون، د اسلامي نظام پېژندنه او د ځوانانو ترمنځ د يووالي راوستل بیان کړل.

نوموړي همدارنګه وویل: مخامخ جګړې پای موندلای او د هېواد او اسلام غليمان مو یاد ډکر کې مات کړي دي اوس یې وار را رسېدلی ترڅو د فکري جګړې ډګر کې مبارزه ترسره کړو او د فکري جګړې مخه ونیسو.

همداراز نوموړي له ځوانانو وغوښتل، ترڅو د‌ دښمن د فکري جګړې پر وړاندې هوښیار پاتې شي او د نظام په ملاتړ کار وکړي.

همدارنګه د سیمنار په ترڅ کې علماؤو د اسلامي نظام موخو، ارزښت او اړتیا په اړه تفصیلي معلومات وړاندې کړل او له ځوانانو یې وغوښتل، چې د اسلامي نظام د ټينګښت او پایښت لپاره مټې راونغاړي. 

 د یاد سیمنار یو شمېر ګډون‌وال د داسې برنامو جوړول د ځوانانو فکري سمون، د معلوماتو زیاتوالي او ویښتیا کې اړین بولي او له مسؤلینو غواړي ترڅو ورته نورې برنامې هم ورته جوړي شي.

۱۴۰۳/۴/۱۹ ھ ش 
۲۰۲۴/۷/۹ ميلادي