زابل کې د رسنیو له مسؤلینو، خبريالانو او د امارتي ادارو له ویاندویانو سره د همغږۍ ناسته وشوه

د زابل اطلاعاتو او فرهنګ ریاست له لوري د افغان خبریالانو د خونديتوب کمېټې په همکارۍ د رسنیو له مسؤلینو، خبريالانو او د امارتي ادارو له ویاندویانو سره د همغږۍ ناسته وشوه.
د اطلاعاتو او فرهنګ رئیس مولوي احمد مختار وویل: د اسلامي امارت له بیا حاکمیت وروسته زابل کې رسنیزې چارې ښې شوي دي، نوموړي د رسنیو له مسؤلینو څخه وغوښتل چې د عالیقدر امیرالمؤمنین (حفظه الله) فرامین او د امارتي ادارو لاسته راوړنې په ښه توګه رسنیزې کړي.
د افغان خبریالانو د خونديتوب کمېټې ولایتي مسؤل وویل: په زابل کې د رسنیو پر وړاندې جدي ستونزه نشته او د خبریالانو اطلاعاتو ته لاسرسی زیات شوی دی، په پام کې ده، چې د خبریالانو لپاره روزنیز پروګرامونه ترسره شي او د خصوصي رسنیو ملاتړ به لا زیات شي.
دغه راز د ناستې ګډونوالو هم د رسنیزو چارو لاښه والي په موخه خپل وړاندیزونه او نظرونه شریک کړل.

۱۴۴۸/۱/۱۶ هـ ق