د لرغون پېژندنې کمېټې پلاوي سمنګان، تخار او بدخشان ولایتونو ته سفر وکړ
د لرغون پېژندنې کمېټې یو پلاوي، چې د کوشاني نړیوالو څېړنو مرکز علومو اکاډمۍ، ملي موزیم، لرغون پېژندنې او د تاریخي آبداتو د ساتنې او ترمیم له برخو څخه جوړه ده، د تخار، بدخشان او سمنګان ولایتونو له تاریخي آبداتو او لرغونو سیمو څخه کتنه او څېړنه وکړه.
دغه پلاوي د اطلاعاتو او کلتور ریاستونو له مسؤلینو، ځايي اوسیدونکو او امنیتي مسؤلینو سره د لیدنې پر مهال د عالیقدر امیرالمومنین حفظه الله د ۵/۱/۱۴۴۵ هجري قمري کال لومړی شمېره فرمان تشریح کړ او د فرهنګي ارزښتونو د ساتنې په اړه یې د خلکو او مسؤلینو پوښتنو ته قناعت وړ ځوابونه وړاندې کړل.
د لرغون پېژندنې رئیس سید ذبیح الله سادات په وینا: یاد پلاوي د بدخشان ولایت د کشم پخوانۍ کلا او کاروان سرای، د تخار ولایت د آی خانم او پخوانۍ کلا، د سمنګان ولایت د خلم بالاحصار، خرم او سارباغ کاروان سرایونو حدود وټاکل او سیمه ییزو مسؤلینو ته یې سپارښتنه وکړه چې د دغو سیمو د غصب او ویجاړۍ د مخنیوي په موخه جدي پاملرنه وکړي.
ښاغلي سادات زیاته کړه، چې دا سفرونه د هېواد د تاریخي او فرهنګي آثارو د ساتنې او احیا په برخه کې د اطلاعاتو او کلتور وزارت د کلک هوډ څرګندونه کوي او هیله مند یو چې د محترمو هېوادوالو او امارتي ادارو په همکارۍ وکولای شو نور لرغوني آثار هم وپېژنو، وساتو او را ژوندي یې کړو.
۱۴۴۷/۴/۱۸ هـ ق
