د عالیقدر امیرالمؤمنین حفظه الله ۱۷مې ګڼې فرمان تشریح شو

د هېواد په ګڼ شمېر ولایتونو کې د اطلاعاتو او کلتور ریاستونو له لوري د عالیقدر امیرالمؤمنین حفظه الله ۱۷مې ګڼې فرمان چې د ناوړه دودونو د مخنیوي په اړه صادر شوی و، د حکومتي ادارو مسؤلینو، رسنیو استازو، قومي مخورو، شاعرانو، لیکوالانو، فرهنګپالانو او ځوانانو ته تشریح شو.
د اطلاعاتو او کلتور ریاستونو مسؤلینو د عالیقدر امیرالمؤمنین حفظه الله له فرمانونو اطاعت او پیروي د ټولو مسلمانانو شرعي او ټولنیز مسؤلیت وباله او زیاته یې کړه، چې د خېښۍ، ودونو، مصیبتونو او همدا راز له حج او عمرې څخه د راستنېدو پرمهال د ناوړه رواجونو مخنیوی د ټولو ګډ مسؤلیت دی او د ستونزو په حل کې باید یو له بل سره همکار پاتې شو. 
همدارنګه د اطلاعاتو او کلتور ریاستونو مسؤلینو زیاته کړه، چې د ناوړه دودونو مخنیوی یوه جدی اړتیا ده او د ټولنې ټول اقشار باید په دې برخه کې کار وکړي، ځکه ناوړه دودونه د بېلابېلو اقتصادي، فرهنګي، ټولنیزو او نور ستونزو لامل ګرځي.
دغه راز د حکومتي ادارو مسؤلینو، رسنیو استازو، قومي مخورو، شاعرانو، لیکوالانو، فرهنګپالانو او ځوانانو د یاد فرمان اطاعت او پلي کول په ټولنه کې یو مهم اصل یاد کړ او ویې ویل: موږ په هغه ټولنه کې ژوند کوو، چې ناوړه دودونه د اقتصادي، فرهنګي او ټولنیزو ستونزو لامل ګرځي او باید ترې مخنیوی وشي او د اطلاعاتو او کلتور ریاستونو مسؤلینو ته یې د پوره همکاریو ډاډ هم ورکړ.
۱۴۴۷/۳/۱۵ هـ ق