بادغیس کې د مشاعرو د تنظیم قانون د تشریح سیمینار جوړ شو

د بادغیس ولایت د اطلاعاتو او کلتور ریاست له لوري شاعرانو، لیکوالانو او ادیبانو ته د مشاعرو د تنظیم قانون د تشریح سیمینار جوړ شو.
د سیمینار په ترڅ کې د علماوو شورا رئیس شيخ محمد معروف صبور د اسلام مبارک دین له نظره د شعر پر اهمیت خبرې وکړې او له شاعرانو يې وغوښتل، چې د شعر لیکلو پر مهال اسلامي ارزښتونو ته پاملرنه وکړي او د هغو شعرونو له لیکلو ډډه وکړي، چې د اسلامي اصولو خلاف وي.
همدا راز د بادغیس والي حافظ محمد امین جان عمري د عالیقدر امیرالمؤمنین حفظه ‌الله تعالی د فرمانونو د پلي کېدو او په اسلامي ټولنه کې د شاعرانو د ونډې په اړه تفصيلي خبرې وکړې.
د اطلاعاتو او کلتور رئیس آخندزاده مطیع ‌الله متقي وویل: د وياړ او خوښۍ ځای دی، چې د اسلامي نظام تر سیوري لاندې ژوند کوو، داسې يو نظام چې د خلکو د ژوند ټولو اړخونو ته، په ځانګړې توګه کلتور او ادب ته ډېره پاملرنه لري، شعر زموږ په ټولنه کې لوړ ارزښت لري او نن د مشاعرو د تنظیم قانون چې د عالیقدر امیرالمؤمنین حفظه ‌الله له خوا توشیح شوی، تاسو ته وړاندې کېږي، تر څو د اسلام مبارک دین له نظره د شعر مقام او ارزښت لا روښانه شي.
د یادونې وړ ده، چې تر سيمينار وروسته یو شمېر شاعرانو خپل شعرونه هم ولوستل.

۱۴۴۷/۲/۵ هـ ق