د جهادي ارزښتونو د ساتنې عمومي رئیس د کندهار ولايت د قلموالو مبارزينو سره غونډه وکړه
د جهادي ارزښتونو د ساتنې عمومي رئیس ذبيح الله نوراني د مل پلاوي په ملتيا د کندهار ولايت په اطلاعاتو او کلتور رياست کې د ياد رياست د رئيس مولوي انعام الله سمنګاني په شتون کې د قلموالو مبارزينو د استازي مولوي شمس الله صميم، مشهور او مخورو قلموالو مبارزينو سره غونډه وکړه.
په پيل کې د کندهار د اطلاعاتو او کلتور رئيس مولوي انعام الله سمنګاني راغلو مبارزينو ته د ښه راغلاست ويلو ترڅنګ راغلي پلاوي ته مبارزين ور وپېژندل.
ورپسې د جهادي ارزښتونو د ساتنې عمومي رئیس ذبيح الله نوراني قلموالو مبارزينو ته ښه راغلاست ووايه او ويې ويل: دا چې موږ په تېرو دريو انقلابونو کې خپل تاريخ ته توجه نه ده کړې، دا يې لامل دی چې زموږ ولس ډېره برخه د تېر تاريخ څخه ناخبره او د دښمن د دروغجنو افواهاتو ښکار شوی دی.
همدارنګه ښاغلي نوراني زیاته کړه، چې کندهار ولايت د جهادي اړخه يو بډايه تاريخ لري او په جهادي بهير کې تر ډېره د اسلامي امارت په رهبرۍ کې پاتې شوی دی؛ نو د جهادي ارزښتونو او د شهيدانو د سوانحو په راټولولو کې بايد ټول مجاهدين او قلموال مبارزين خپله همکاري او هڅې ونه سپموي.
په پای کې قلموالو مبارزينو هم خپل نظرونه شریک کړل او د هرډول همکارۍ ډاډ يې ورکړ.
۱۴۴۶/۹/۱۸ ھ ق
۱۴۰۳/۱۲/۲۸ ھ ش
