محمدطاهر زهير: د اطلاعاتو او فرهنګ وزارت د ناشرانو او کتاب پلورونکو غوښتنې او ستونزې څېړي
د اطلاعاتو اوفرهنګ وزارت سرپرست او نوماند وزیر محمد طاهر زهير نن د کابل د جوي شير سيمې د ناشرانو او کتاب پلورونکو له استازو سره په کتنه کې د هغوى غوښتنې اوستونزې واوريدې .
د باختراژانس خبريال د خبرله مخې؛ په دې کتنه کې وسيم اميري او محمد اکبر عظيمي د کابل ښار د جوي شير د ناشرانو او کتاب پلورونکو په استازيتوب خپلې غوښتنې اوستونزې د اطلاعاتواوفرهنګ وزارت له سرپرست سره شريکې کړې .
هغوى خپلې لاندې ستونزې د اطلاعاتو او فرهنګ وزارت له سرپرست سره مطرح کړې او د هغوی د حل غوښتنه یې وکړه: د کتاب د بازار لپاره د مناسب ځاى نشتوالی، د کتاب د نندارتون د جوړولو لپاره د ځاى نشتوالی، د حکومت له خوا د څو ډوله ماليې اخیستل ،سره له دې چې د دوى په خبره (د قانون له مخې خپرونې اوکتاب د ماليې له ورکولو څخه معاف دي )، دغه راز د قرنطين په مياشتوکې د دوى د دکانونو د کرايې پر ورکولو د کابل ښاروالۍ ټينګار، په داسې حال کې چې په دې موده کې د کابل ولايت او د اړوندو بنسټونو د پرېکړې له مخې، د اصنافو دکانونه تړلې وو.
محمد طاهر زهير د ناشرانو اوکتاب پلورونکو ملاتړ وکړ او د کتاب د دايمي او نړيوال نندارتون او همدارنګه د کتابونو د پلورلو لپاره د مناسب ځاى د جوړولواو د کتاب اوکتاب پلورنې د بازار د ودې او غوړېدا لپاره یې د دغه وزارت د پروګرامونوپه باب معلومات ورکړل.
د اطلاعاتواوفرهنګ وزارت سرپرست د کتنې په بهير کې د دغو ناشرانو او کتاب پلورونکو په شتون کې د کابل له والي محمديعقوب حيدري سره اړیکه ونیوله او د دوى د دکانونود کرايې ستونزه یې ورسره شريکه کړه او په دې برخه کې يې د کابل والي پرهمکارى تينګاروکړ.
د کابل والي ژمنه وکړه چې له اصنافو سره د مرستې له پیسو به له دوى سره همکاري وشي.
په همدې ترتيب د اطلاعاتواوفرهنګ وزارت سرپرست د دغه وزارت د نشراتي چارو معين عبدالمنان شيواي شرق ته وویل چې په دولتي ورځپاڼو کې په وړيا ډول يوه پاڼه د هغو کتابونو معرفي کولو ته ځانګړې شي چې ناشران یې چاپوي.
دغه راز د اطلاعاتواوفرهنګ وزارت سرپرست د ناشرانواو کتاب پلورونکو د نورو ستونزو د څېړنې په برخه کې د همکارى ژمنه وکړه او له هغوى څخه يې وغوښتل چې خپلې غوښتنې اوستونزې په ليکلي ډول هم دغه وزارت ته وسپاري .
د يادونې وړ ده چې د کابل په جوي شير کې دېرش ناشران اونوي کتاب پلورونکي فعاليت کوي .
کابل / دزمري ٣٠مه /باختر
