د ځوانانو چارو معینیت ۵ کسیز پلاوي کندوز ته سفر وکړ
پنجشنبه ( ۱۴ د ذوالقعدې ۱۴۴۵) کندوز ولايت ته د اطلاعاتو او فرهنګ وزارت د ځوانانو چارو معینیت څخه ۵ کسیز پلاوی د خپل سفر په ترڅ کې ددغه ولايت د اطلاعاتو او فرهنګ رئیس مطیعالله روحاني سره ليدنه ترسره کړه.
د اطلاعاتو او فرهنګ وزارت د ځوانانو چارو معینیت څخه د راغلي پلاوي مشر هجرتالله سادات کندوز ولايت ته د خپل سفر موخه د فریلانسینګ تخصصي پروګرام د زدکړیز پروګرام له بهیر څخه لیدنه ياده کړه.
ښاغلي سادات زیاته کړه؛ د ځوانانو چارو معينيت د ځوان کهول لپاره د پام وړ هلې ځلې کړي او راتلونکي کې هم پلان لري، چې په ټولو برخو کې په ځانګړي ډول ځوانانو لپاره ګنې برنامې ترسره کړي.
د اطلاعاتو او فرهنګ رئیس مطیعالله روحاني کندوز ولايت ته د ورغلي پلاوي څخه د مننې ترڅنګ وویل: د اطلاعاتو او فرهنګ ریاست په چوکاټ کې د ځوانانو ښوونیز مرکز هم پرانيستی، چې دامهال پکښې په سلګونه تنه ځوانانو په وړیا ډول په مختلفو برخو کې زده کړې کوي.
۱۴۰۳/۳/۳ هـ ل
۲۰۲۴/۵/۲۳ میلادي
