په ننګرهار کې د ماشومانو لپاره يو مجهز کتابتون جوړ شو
څه موده وړاندې د ننګرهار ولایت د اطلاعاتو او کلتور رياست د مسؤلینو په هلو ځلو په یاد ریاست کې، د جاپان هېواد او د شانتي رضاکاره ټولنې په مالي همکارۍ د ۱۳۵۰۰۰ امريکايي ډالرو په لګښت د ماشومانو لپاره د يو مجهز کتابتون جوړېدلو چارې پيل شوې، چې نن د سنبلې په شپږمه د ننګرهار مرستيال والي مولوي سعيد احمد بنوري، د اطلاتو او کلتور رئيس مولوي نور محمد حنيف او د رياست منسوبينو، د يادې موسسې استازي انجينر عنايت الله نصر، د کلي مشرانو او ځايي اوسېدونکو له لوري د پټۍ په پرې کولو رسماً پرانیستل شو.
د پرانیستې په مراسمو کې د ننګرهار مرستیال والي د شانتې رضاکارې ټولنې له مسؤلينو او له جاپان هېواد څخه مننه وکړه او ویې ويل: د تعليم له برکته په نړۍ کې پرمختګونه رامنځته کیږي. دا ډېر د خوشحالۍ ځای دی، چې نن موږ د ماشومانو لپاره په پاخه او اساسي ډول د يو مجهز کتابتون پرانیسته کوو.
د ښاغلي حنیف په خبره، دا کتابتون به هم د عامه کتابتون په شان د ماشومانو پرمخ خلاص او د دريو تنو استادانو له لوري به ماشومانو ته پکې زده کړې ورکول کیږي.
١٤٤٥/٢/١١ ھ ق
١٤٠٢/٦/٦ ھ ش
