د اسلامي حکومتولۍ د ترویج پروګرام تر سره شو
تېره ورځ د اسلامي حکومتولۍ د ترویج پروګرام د بادغیس ولایت د اطلاعاتو او کلتور ریاست له لوري د ځوانانو د ملي ټولنیز سازمان په همکارۍ د دغه ولایت د علماوو د سرتاسري شورا په تالار کې جوړ شو، په یاد پروګرام کې د دغه ولایت اداري مسؤلینو، علماوو، د مدني ټولنو غړو او رسنیو ګډون کړی و.
د غونډې په پیل کې د دغه ولایت د اطلاعاتو او کلتور رئیس اخندزاده مطیع الله متقي د اسلامي حکومتدارۍ د ترویج په اړه خبرې وکړې، همدا ډول یې د غونډې ګډونوالو ته د عالیقدر امیرالمؤمنین حفظه الله سپارښتنې او لارښوونې واورولې.
ورپسې د بادغیس ولایت د علماوو شورا رئیس شیخ الحدیث الحاج مولوي محمد معروف په خپلو خبرو کې وویل، موږ د اسلامي حکومتدارۍ د ترویج مسؤلیت لرو او په نړۍ کې دوه قوانین شته، شرعي قانون او غیرې شرعي قانون، موږ باید د شرعي قانون اطاعت وکړو.
۱۴۴۴/۱۲/۲۱ هـ ق
۱۴۰۲/۴/۱۸ هـ ش
