د نصرالله حافظ د فرهنګي فعاليتونو د سمينار په اړه غونډه جوړه شوه
د اطلاعاتو او فرهنګ وزارت د فرهنګ او هنر معين هارون حکيمي په مشرۍ نن د نصرالله حافظ د فرهنګي او ادبي فعاليتونو په اړه د يو سمينار د جوړولو په موخه غونډه جوړه شوه.
د باختر آژانس د خبر له مخې: په دې غونډه کې په داسې حال کې چې په فرهنګي چارو کې د جمهور رييس سلاکار محمد زرين انځور او د بېلا بېلو بنسټونو استازو ګډون درلود، د دغه سمينار د جوړولو په خاطر د لازمو تياريو په اړه خبرې وشوې.
دغونډې غړو د نصرالله حافظ د يوشمېر آثارو د چاپ، د مقالو د عنوانونو فهرست، د سمينار د جوړولو ځاى او څرنګوالي په اړوند خپل ليدلورى، وړانديزونه او طرحي وړاندې کړې.
دغه راز هارون حکيمي د نصرالله حافظ د فرهنګي او ادبي شخصيت په اړه معلومات ورکړل او په پرتمين ډول يې د سمينار پر ترسره کولو ټينګار وکړ.
هغه څرګنده کړه: ياد سمينار به په نږدې راتلوونکي کې د هېواد د جمهور رييس په لارښونه ترسره شي.
کابل/ د زمري ٩ مه/ باختر
