ډاکټر وفايي زاده: جګړو په هېواد کې پر فرهنګ ناوړه اغېزه کړې

د اطلاعاتو او فرهنګ وزارت سرپرست ډاکټر محمد قاسم وفايي زاده نن د دغه وزارت د فرهنګ او هنر له معین او یو شمېر رییسانو سره په کتنه کې وویل چې په هېواد کې له تېرو څلورو لسیزو راهیسې پیل شویو جګړو پر نورو برخو سربېره پر فرهنګ هم ناوړه اغېزه کړې ده.

هغه وویل چې ناوړه فرهنګ باید له منځه یوړل شي او پر ځای يې د هېواد  اصیل فرهنګ دودولو لپاره کوټلي ګامونه پورته شي.

وفايي زاده زیاته کړه چې د فرهنګي میراثونو ساتنه د اطلاعاتو او فرهنګ وزارت له لومړیتونو څخه ده او په دغه برخه کې به خپلې چارې  ګړندۍ کړي.

سرپرست وزیر د فرهنګي معینیت رییسانو ته لارښوونه وکړه چې خپلې ستونزې، وړاندیزونه او خنډونه په نښه کړي چې د حل لپاره یې په ګډه کار وکړي.

په ورته وخت کې د اطلاعاتو او فرهنګ وزارت د فرهنګ او هنر معین هارون حکیمي د خپل اړوند معینیت د چارو په اړه وغږېد او ستر کاري لومړیتوبونه یې په ګوته کړل. ده ټینګار وکړ چې خپلې چارې به په همغږۍ سره مخ ته وړي او د فرهنګ د بډاینې لپاره به زیار باسي.

کابل/ د چنګاښ ۱۴ مه/ باختر