د مطالعې فرهنګ عامول د اطلاعاتو او فرهنګ ریاست له کاري لومړیتوبونو څخه دي
دغه څرګندونې د غزني د اطلاعاتو او فرهنګ رئیس ملاحمیدالله نثار د دغه ولایت د کتابپلورونکو اتحادیې له مسؤلینو او غړو سره د لیدنې پر مهال وکړې.
ښاغلي نثار وویل: د اسلامي او افغاني اصیل فرهنګ وده او د مطالعې فرهنګ عامول د اطلاعاتو او فرهنګ ریاست له کاري لومړیتوبونو څخه دي او هڅه کیږي، چې په ټولنه کې کتاب د ځیرکو موبایلونو او ټولنیزو شبکو بدیل وګرځول شي.
د نوموړي په وینا؛ اسلامي امارت د کتابپلورونکو ملاتړ ته ژمن دی او د کتاب پلورنکو اتحادیې غړي هم باید د هغو کتابونو په پېژندنه او راټولولو کې چې د حکومت له پالیسۍ سره په ټکر کې وي لا ډېره همکاري وکړي.
په دې غونډه کې د کتابپلورونکو اتحادیې مسؤلینو او غړو هم خپلې ستونزې او وړاندیزونه شریک کړل.
د یادونې وړ ده، چې د غزني اطلاعاتو او فرهنګ ریاست اړوند د البیروني عامه کتابتون ته د یو خصوصي ښوونیزې ادارې مسؤل محمدحسن قاسمي له خوا دیني، ادبي، تاریخي او عصري علومو لسګونه ټوکه کتابونه ډالۍ شول.
۱۴۴۸/۱/۲۰ هـ ق
