د فرهنګ او هنر معین د کابل له بالاحصار تاریخي سیمې څخه لیدنه وکړه
د اطلاعاتو او فرهنګ وزارت د فرهنګ او هنر معین شیخ عبدالرحمن طیبي، د تاریخي آبداتو د ساتنې او بیارغونې رئیس انجنیر محمد حسیب نسیمي، د لرغون پیژندنې رئیس مولوي سید ذبیحالله سادات، د ملي موزیم رئیس مولوي صبغتالله عابد، د ملي ارشیف رئیس قاري عبیدالله حنیف او د ترنم او ترانو رئیس مولوي امینالله مستغفر په ملتیا د کابل له بالاحصار تاریخي سیمې څخه لیدنه وکړه.
دغه لیدنه د کابل بالاحصار په تاریخي سیمه کې د ترسره شویو فعالیتونو د ارزونې په موخه ترسره شوه.
د آغاخان فرهنګي بنسټ مسؤلینو د بالاحصار د تاریخي مخینې، فرهنګي او تاریخي ارزښت، همداراز په دې سیمه کې د ترسره شویو حفاظتي فعالیتونو او کیندنو په اړه معلومات وړاندې کړل.
دغه راز د اطلاعاتو او فرهنګ وزارت د فرهنګ او هنر معین په خپلو خبرو کې د بالاحصار د ساتنې او په دې سیمه کې د کیندنو په برخه کې د آغاخان فرهنګي بنسټ له فعالیتونو څخه قدرداني وکړه او د دغې تاریخي سیمې د معرفي او مستندسازۍ پر اهمیت یې ټینګار وکړ.
نوموړي د یاد بنسټ له کارکوونکو څخه وغوښتل چې د کابل بالاحصار اړوند کره تاریخچه، انځورونه او مستند معلومات راټول او د مجلې یا بروشور په بڼه یې ترتیب او د خپرولو لپاره چمتو کړي، ترڅو د خلکو او لېوالتیا لرونکو کسانو لپاره د دې تاریخي او فرهنګي سیمې د لا ښه پیژندنې زمینه برابره شي.
