د اطلاعاتو او فرهنګ وزارت لوړپوړو مسؤلينو د استاد حبیب الله رفيع عیادت او د خدمتونو ستاینه وکړه

د اطلاعاتو او فرهنګ وزارت د خپرونو چارو معين ښاغلي مهاجر فراهي، د هنر او فرهنګ معين ښاغلي مولوي عتیق الله عزيزي، د وزارت مقام حقوقي سلاکار مولوي رحمت الله نړيوال، د ټوليزو رسنيو په نشراتو د څار رئيس مولوي صفی الله رائد او د عامه اړيکو رئیس او ویاند خبیب غفران د هيواد د پیاوړي څيړونکي، تاريخ پوه او لیکوال استاد حبیب الله رفيع د عیادت، د خدمتونو ستاينې او د اعزاز پګړۍ په سرکولو په موخه د استاد کور ته تشريف يووړ.
د هنر او فرهنګ معين ښاغلي عزيزي صیب استاد رفيع ته د ښه راغلاست تر څنګ وویل: د ا.ا.ا. مو په راتګ خوښ دی، تاسو خپل علمي عظمت او وقار ساتلی دی او د هيواد له غوره څيړونکو څخه ياست، ترسره کړي خدمتونه مو د ډيرې ستاينې وړ دي، د اطلاعاتو او فرهنګ وزارت مو د آثارو د چاپ او نورو څيړنو ترسره کولو په برخه کې همکار دی.
همدا راز د خپرونو چارو معين ښاغلي مهاجر فراهي استاد حبیب الله رفيع ته خپل ليکلي آثار او نور علمي آثار د ډالۍ په ډول وسپارل.
د ليدنې په ترڅ کې د اطلاعاتو او فرهنګ وزارت د معين صاحبانو له لوري استاد حبیب الله رفيع ته د اعزاز پګړۍ هم ورپه سر شوه.

۱۴۴۸/۱/۲ هـ ق