ده صلاح، پل حصار او اندارب ولسوالیو کې د قومونو ترمنځ د یووالي په اړه جلا جلا غونډې جوړې شوې
د بغلان اطلاعاتو او کلتور ریاست له لوري د قومونو ترمنځ د یووالي او همغږۍ د پیاوړتیا په موخه ده صلاح، پل حصار او اندارب ولسوالیو کې جلا جلا غونډې جوړې شوې.
د اطلاعاتو او کلتور رییس په دغو غونډو کې یووالی د اسلامي ټولنې له بنسټیزو ارزښتونو څخه وباله او ویې ویل: که اسلامي ټولنه د یووالي، ورورولۍ او همدردۍ پر لور حرکت وکړي، نو ډېرې ټولنیزې ستونزې به حل شي او په ټولنو کې به د پرمختګ، ثبات او امنیت زمینه برابره شي.
نوموړي ټینګار وکړ، چې د افغانستان خلک باید د پخوا په څېر د هر ډول تېري او اشغال پر وړاندې خپل اتحاد او یووالی وساتي.
په دغو غونډو کې یو شمېر علماوو او د سیمې مشرانو هم د پاکستان پوځي رژيم تېری وغنده او ټینګار یې وکړ، چې د افغانستان خلک به د خپل یووالي په ساتلو سره د هر ډول تېري پر وړاندې ودرېږي او د ملي همغږۍ په مټ به هېڅ یرغلګر ونشي کولای خپلو موخو ته ورسېږي.
