بغلان کې د کتاب نندارتون جوړ شو
دغه نندارتون د بغلان ولایت اطلاعاتو او کلتور ریاست له لوري دې ولایت مرکز اړوند شمرق تاریخي سیمه کې د مطالعې دود غښتلی کولو او د کتاب لوستلو لور ته د ځوانانو هڅولو په موخه جوړ شوی دی.
د اطلاعاتو او کلتور رئیس مولوي اسدالله مصطفی هاشمي د دې ننداتون پرانیستلو پر مهال وویل: د مطالعې دود غښتلی کول، د دې ریاست له مهمو کاري لومړیتوبونو څخه دی، ځکه ننني عصر کې مطالعه د فکري ودې او د ټولنې د پرمختګ اساسي وسیله ده، هڅه کوو، چې د مطالعې مینوالو ته لا ډېر فرصتونه برابر کړو.
د عامه کتابتون مدیر وویل: دغه نندارتون د شمرق لېسې په همکارۍ جوړ شوی، چې لسګونو ښوونکو، زده کوونکو او د مطالعې مینوالو پکښې ګډون وکړ، دې ننداتون کې سلګونه ټوکه بېلابېل کتابونه نندارې ته ایښودل شوي او تمه ده چې راتلونکې هره میاشت کې د پلخمري ښار او ولسوالیو کې دا ډول نندارتونه جوړ شي.
د یاد نندارتون یو شمېر ګډونوالو د دې نندارتون جوړېدو څخه خوښي څرګنده کړه او د دې ډول نندارتونونو د دوام او زیاتوالي غوښتونه يې وکړه.
۱۴۴۶/۱۱/۱۹ هـ ق
