کابل کې د چین سفیر د ګرځندوی، مالي او اداري چارو معین سره وکتل
چهارشنبه (۱۴۴۷ رجب۲۴مه) کابل کې د چين سفیر ښاغلي ژاو شینګ د اطلاعاتو او کلتور وزارت د ګرځندوی، مالي او اداري چارو معين مولوي قدرت الله جمال سره د لا ډېرې همغږۍ او د ګرځندوی او فرهنګي برخو د پياوړتیا په موخه لیدنه وکړه.
د ګرځندوی، مالي او اداري چارو معین مولوي قدرت الله جمال د چین او افغانستان ترمنځ د ګډو فرهنګي او تاریخي ارزښتونو یادونه وکړه او د چین له سفیر څخه یې وغوښتل، چې د ګرځندوی سکتور پیاوړتیا، د هوټلدارۍ او توریزم انستیتیوت د زده کړیالانو ظرفیت لوړولو، د ویزو په برخه کې د اسانتیاوو رامنځته کولو او د ګرځندوی مارکیټینګ او پانګونې برخو کې خپلې تجربې شريکې او پوره همکاري وکړي.
دغه راز ښاغلي جمال د وریښمو لارې په اړه خبرې وکړې او د دواړو هېوادونو ترمنځ د لرغونو آثارو د نندارتونونو جوړولو او مسلکي کسانو د رابللو غوښتونکی شو.
د ناستې په لړ کې د چین سفیر ښاغلي ژاو شینګ وویل: چین او افغانستان ګډې او نیکې اړیکې لري، چې باید دا اړیکې د تل په څیر دوامداره وساتل شي.
ښاغلي ژاو شینګ د دوه اړخیزو همکاریو او تجربو شریکولو ډاډ څرګند کړ او زیاته یې کړه؛ د فرهنګي او سیاحتي اړیکو د پیاوړتیا په موخه دوه اړخیزې همکارۍ اړینې دي.
د یادونې وړ ده، چې د ناستې په وروستیو کې د چین سفیر له لوري ښاغلي معین صاحب ته او د ښاغلي معین صاحب له لوري د چین سفیر ته بېلابیلې ډالۍ ورکړل شوې.
۱۴۰۴/۱۰/۲۴هـ ق
