پکتیا زون کې د رسنیو له مسؤلینو او ویاندویانو سره د همغږۍ ناسته ترسره شوه

دوشنبه ( ۱ د صفر ۱۴۴۶) د اطلاعاتو او کلتور وزارت اړوند اطلاعاتو ته د لاسرسي ریاست ترچتر لاندي د پکتیا زون د رسنیو له مسؤلینو او د امارتي ادارو له ویاندویانو سره د همغږۍ غونډه ترسره شوه.
غونډه کې د اطلاعاتو او کلتور وزارت د ګرځندوی مالي او اداري معین مولوي قدرت الله جمال، د خپرونو چارو معینیت کفیل ښاغلی ضیاء الحق حقمل، اطلاعاتو ته د لاسرسي رئیس مولوي رحمت الله نړیوال، د پکتیا پوهنتون رئیس، د پکتیا ولایت مقام د دفتر رئیس، د رسنیو استازو، د امارتي ادارو ویاندویانو او ګڼ شمېر نورو مسؤلینو ګډون کړی وو.
پيل کې اطلاعاتو ته د لاسرسي رئیس مولوي رحمت الله نړیوال خبرې وکړې او اطلاعاتو ته د لاسرسي په برخه کې یې د رسنیو مسؤلینو ته ډاډ ورکړ، چې اطلاعاتو ته د لاسرسي په برخه کې به ستاسو ستونزو ته په ځانګړې توګه رسېده ګي کوو.
ورپسې د خپرونو چارو معینیت کفیل ښاغلي ضیاء الحق حقمل ناستې ته په وینا کې وویل: رسنۍ د خلکو پر اذهانو رغنده اغېز لري، باید ښه ذهن سازي یې وکړئ، د رسنیو مسؤلیت جوړیږي چې خلکو ته بېلابېل اصلاحي پروګرامونه جوړ کړي، د غربي رسنیو کار د خلکو ترمنځ تفرقه اچول دي، زموږ رسنۍ مسؤلیت لري، چې د مسلمانانو په ځانګړې توګه د افغانانو تر منځ د یووالي او وحدت لپاره کار وکړي.

همدا ډول د ګرځندوی مالي او اداري چارو معین مولوي قدرت الله جمال وویل: په ټولو زونونو کې به دا ډول د رسنیو او امارتي ادارو ویاندویانو سره د همغږۍ غونډې کیږي، موږ او تاسو یو وجود یو، مشورې به سره شریکوو، تر څو چارې مو لاپیاوړې شي، د هیواد اقتصادي خبرونو ته پراخ خبري پوښښ ورکوئ، خلګ مو ډېر ستړي شوي دي باید نور یې خوشحاله وساتو.
د ناستې په وروستیو کې د خپرونو چارو معینیت کفیل ښاغلي حقمل د رسنیو د مسؤلینو ستونزو او پوښتنو ته جوابونه وویل.
غونډه په اختتامیه دعا پای ته ورسېده.

۱۴۰۳/۵/۱۵ ھ ل 
۲۰۲۴/۸/۵ ميلادي