د ګرځندوی، مالي او ادري معین فاریاب او جوزجان ولایتونو ته سفرونه وکړل
د اطلاعاتو او فرهنګ وزارت د ګرځندوی، مالي او اداري معین مولوي قدرت الله جمال د یوه پلاوي په مشرۍ فاریاب او جوزجان ولایتونو ته سفرونه وکړل.
ښاغلي جمال د فاریاب د اطلاعاتو او فرهنګ ریاست له مسؤلینو سره په لیدنه کې د دې ریاست اړوند د ملکیتونو وضعیت وڅېړه او د ادارې له بېلابېلو برخو څخه یې لیدنه وکړه.
ښاغلي جمال د فاریاب د اطلاعاتو او فرهنګ ریاست ترسره کړې فعالیتونه وستایل او د دې ریاست د اداري ودانۍ د بیارغولو ژمنه یې وکړه.
دغه راز ښاغلي جمال جوزجان ولایت ته د سفر پر مهال د دغه ولایت د اطلاعاتو او فرهنګ ریاست څخه د لیدنې ترڅنګ د فرهنګي، رسنیزو او ګرځندویي خدمتونو پر ښه والي ټینګار وکړ.
مولوي قدرت الله جمال د جوزجان د اطلاعاتو او فرهنګ ریاست له مسؤلینو سره په لیدنه کې وویل: د دې ریاست لپاره د یوه معیاري درې پوړیزې ودانۍ د جوړېدو پلان په پام کې نیول شوی، ترڅو یې په جوړېدو سره مناسب اداري او فرهنګي خدمتونه تر سره کولو ته زمینه برابر شي.
۱۴۴۷/۱۱/۲۹ هـ ق
