په کابل ښار کې د خواجه صفا زيارت د ترميم کار پيل شو

د اطلاعاتو او فرهنګ وزارت د فرهنګ او هنر معين هارون حکيمي نن د کابل ښار په لومړۍ ناحيه کې د خواجه صفا زيارت د ترميم کار پرانيست.
د باختر آژانس خبريال د خبر له مخې؛ د خواجه صفا زيارت د ترميم د کار د پرانیستلو په مراسمو کې په داسې حال کې چې د اطلاعاتو او فرهنګ وزارت سلاکاران ډاکټر طارق رشاد او فقير ميوند، د دغه وزارت وياند محمد صابر مومند او د ملي موزيم رييس محمد فهيم رحيمي هم حاضر وو، د فرهنګ او هنر معين د تاريخي آبداتو د ساتنې په لاره کې د دغې آبدې د ترميم د کار پيل يو ارزښتناک ګام وباله او ويې ويل چې دغه زيارت د کابل ښار له تاريخي او مشهورو آبدو څخه دى.
هغه څرګنده کړه چې د هېواد د تاريخي آبداتو او فرهنګي ميراثونو د ساتنې په اړوند د هېواد د جمهور رييس محمد اشرف غني د پاملرنې او لارښوونې پر بنسټ، نن د خواجه صفا زيارت د ترميم کار د اطلاعاتو او فرهنګ وزارت له بودجې څخه پيل شو او په راتلونکو شپږو مياشتو کې به بشپړ شي.
د فرهنګ او هنر معين څرګنده کړه چې کابل د تاريخي آبداتو او فرهنګي ميراثونو له پلوه بډاى دى، خو تفريحي او سياحتي ځايونه يې زيات کار او ساتنې ته اړتيا لري او دغه آبده هم کولاى شي د کابل د خلکو او نورو سيلانيانو لپاره یو تفريحي او سياحتي ځاى وي.
دغه راز په دغو مراسمو کې د اطلاعاتو او فرهنګ وزارت سلاکارانو هم په خپلو خبرو کې د خواجه صفا زيارت او دغه زيارت ته څېرمه د اوبو د یوې چينې د ارزښت او تاريخي لرغونتيا په اړه معلومات ورکړل.
د اطلاعاتو او فرهنګ وزارت د تاريخي آبداتو د ساتنې رييس ډيپلوم مهندس عبدالاحد عباسي څرګنده کړه چې د خواجه صفا سيمه په اصل کې د بودايي دورې يوه سيمه ده چې وروسته د امير حبيب الله خان د واکمنۍ په وخت کې په دې سيمه کې د ډبرو څو ګنبذي خونې جوړې شوې او دغه زيارت ته څېرمه د اوبو يوه چينه هم شته او له دې سيمې څخه د تفريحي ځاى په توګه هم استفاده کېده.
هغه زياته کړه چې په دې ساحه کې شپږ ډبرينې خونې په ګنبذي ډول جوړې شوې وې چې د وخت په تېرېدو سره يوشمېر یې ويجاړې شوې او يو شمېر نور يې اساسي ترميم ته اړتيا لري چې د هغو د ترميم کار لومړى پړاو د اطلاعاتو او فرهنګ وزارت له بودجې څخه د ۵،۸ میليونو افغانيو په لګښت پيل شو.
همدارنګه د ګذر وکيل محمد عالم او د خواجه صفا سيمې د خلکو شورا رييس آغاجان د هېواد د تاريخي آبداتو او فرهنګي ميراثونو په تېره بيا د خواجه صفا زيارت د ساتنې په خاطر د اطلاعاتو او فرهنګ وزارت د پاملرنې مننه او قدرداني وکړه او د هغه سړک جوړولو ته يې د مسوولينو پاملرنه واړوله چې له سرکارېز څخه تر خواجه صفا زيارت پورې ٧٠٠ متره اوږدوالي لري.

کابل/ د غبرګولي ١۶ مه/ باختر