په ننګرهار کې د هېواد د خپلواکۍ ١٠٤ کليزه ولمانځل شوه

د ننګرهار اطلاعاتو او کلتور رياست او منبر علمي او کلتوري ټولنې په ګډه همغږۍ له انګریزي ښکېلاکه د آزادۍ بېرته ګټلو ۱۰۴ کليزه د يوې غونډې په ترڅ کې ولمانځل شوه.
ياده غونډه د جلال آباد ښار امير شهيد بڼ د شاه امان الله خان مزار ته څېرمه جوړه شوې وه، چې پکې د ننګرهار ولايت ملکي او نظامي ادارو مسؤلينو سربېره د پوهنتون استادانو، محصلينو، ليکوالو، شاعرانو، قومي مشرانو، ځوانانو، ديني علماوو او ګڼ شمېر ښاريانو برخه اخيستې وه.
د غونډې په پیل کې د ننګرهار پوهنتون استاد او د منبر علمي او کلتوري ټولنې غړي دوکتور نجيب الله صالح په خپلو خبرو کې وويل: د وياړ ځای دی، چې نن موږ په داسې يوه غونډه کې ګډون لرو، چې له نن څخه ۱۰۴ کاله وړاندې زموږ پلرونو او نيکونو د انګريزي ښکېلاک څخه د ګران هېواد افغانستان آزادي ترلاسه او موږ او تاسو ته يې د دغه تاريخي ورځې وياړ راوباښه. زموږ مشرانو او غازيانو تل د ديني احکامو سره سم د پرديو او کفارو پر ضد مبارزه کړې او د خپلو سرونو په نذرانه کولو سره یې د دغه هېواد آزادي ترلاسه کړې.
په ورته وخت کې د ننګرهار اطلاعاتو او کلتور رئيس مولوي نور محمد حنيف هم د يادې او نورو تاريخي ورځو په اړه مفصلې او هر اړخيزې خبرې وکړې او زیاته یې کړه، د ګورګين او چنګيز څخه نيولې تر دې دمه پورې زموږ د هېواد مېړنیو شاه زلميانو، مجاهدينو د هېواد د آزادۍ او خپلواکۍ لپاره سترې قربانۍ ورکړي او تاريخونه يې موږ او راتلونکيو نسلونو ته په ميراث پرېښي دي، اوس موږ او تاسې ته په کار ده، چې د خپلو مېړنيو مجاهدينو تاريخونه په زرينو کرښو وليکو او خپلو راتلونکيو نسلونو ته يې په ميراث پرېږدو.

۱۴۴۵/۲/۲ هـ ق
۱۴۰۲/۵/۲۸ هـ ش