پاتو ولسوالۍ کې دوه لرغونې سیمې کشف شوې
د دایکندي ولایت د اطلاعاتو او کلتور رئیس پاتو ولسوالۍ ته د سفر پرمهال دې ولسوالۍ کې دوه لرغونې سیمې کشف کړې.
د مسوولینو په وینا؛ د دې سفر موخه د پاتو ولسوالۍ د تاریخي آبداتو ارزونه، سروي او ثبتول دي، مسؤلینو تاریخي آثار د ټولنې ګډ میراث وباله او د دغو اثارو د کشف کولو او ساتلو په برخو کې یې د خلکو پر همکارۍ ټینګار وکړ.
مسؤلینو زیاته کړه، چې پاتو ولسوالۍ ته د سفر په لړ کې یې دوه تاریخي سیمې سروي او ثبت کړې، لومړۍ یې د خچوزي په سیمه کې د شیر بابا (شاه مردان) زیارت دی، چې تاریخي مخینه یې د خلفاوو راشدینو دورې ته رسېږي او نیلي ښار څخه ۲۵ کیلو مټره لرې موقعیت لري او دویم یې د فتح زي په کلي کې د سید کلبي ارباب زیارت دی، چې تاریخي مخینه یې ۳۰۰ کاله مخکې وخت پوره رسېږي او د نیلي ښار څخه ۲۳ کیلو مټره لرې موقعیت لري.
د سیمې اوسېدونکي وایي، هر کال د پاتو ولسوالۍ او نیلي ښار اړوندو سیمو څخه ګڼ شمېر خلک یادو زیارتونو ته راځي او ځایي اوسېدونکو د ولایت له مقام او د اطلاعاتو او کلتور ریاست څخه د دغو زیارتونو د احاطې دېوال د بیا رغولو غوښتنه وکړه، چې د مسوولینو له لوري د ستونزو د حل ډاډ ورکړل شو.
۱۴۴۷/۹/۸ هـ ق
