نیمروز کې د ښوونيز مرکز له زده کوونکو وروستۍ ازموينه واخېستل شوه
د نیمروز ولایت د اطلاعاتو او کلتور ریاست د ځوانانو چارو آمریت له لوري يوه نيمه مياشت وړاندې د بېلابېلو برخو ښوونيز کورسونه پیل شوي وو، چې د دغو کورسونو په پای ته رسېدو سره له زده کوونکو وروستۍ ازموینه واخېستل شوه.
د اطلاعاتو او کلتور رئیس مفتي حبیبالله الهام د یادې ازموینې په اړه وویل: د یاد ریاست د ښوونيزو کورسونو د دولسمې دورې ۱۲۵ ګډونوالو چې د عربي،انګلیسي ژبو او کمپیوټر زده کړې یې ترلاسه کړې وې، په پنځو صنفونو کې د يوې نيمې میاشتې تعلیمي بهیر له بشپړولو وروسته ازموینه ورکړه.
ښاغلي الهام زیاته کړه؛ په دې ښوونيزه دوره کې د بېلابېلو عمرونو ځوانان د عصري او دیني علومو د زده کړې لپاره شامل شوي وو.
د ازموینې ګډونوالو د اطلاعاتو او کلتور ریاست څخه د دې ښوونيزو کورسونو د برابرولو او د ازموینې د شفافیت له امله مننه وکړه او غوښتنه یې وکړه، چې نور ښوونيز کورسونه هم ورته ترتیب شي.
۱۴۴۶/۹/۱ ق
۱۴۰۳/۱۲/۱۱ ل
