نیمروز کې د ترنم سیالي ترسره او له يوټيوبرانو سره ناسته وشوه

نیمروز ولايت کې داطلاعاتو او کلتور رياست له لوري د ترنم سيالي ترسره او غوره ګډونوال يې د ډاليو په ورکولو سره وستايل شول.
 د اطلاعاتو او کلتور رئيس مفتي حبيب‌الله الهام د ترنم سیالۍ په اړه وويل: دا سیالي د ځوانانو د پټو استعدادونو د کشف کولو، د کلتور او ادب د ملاتړ او د او هنرپالو د هڅولو لپاره ترسره شوه، تر څو ځوانان هم وکولاي شي، د ترنم په ډګر کې په راتلونکي کې د خدمت مصدر وګرځي‌.
ښاغلي الهام ځوانانو ته ډاډ ورکړ، چې دې قشر ته د ښو خدماتو د وړاندې کولو په برخه کې د شته امکاناتو په پام کې نيولو سره هېڅ ډول هڅې نه سپموي.
د يادونې وړ ده، چې د ترنم په سیالۍ کې شاوخوا ۶۰ تنو ځوانو ترانه ویونکو ګډون کړی وو، چې بریاليو او مخکښو ګډونوالو ته د اطلاعاتو او کلتور ریاست له لوري نغدي او غیر نغدي ډالۍ ورکړل شوې.
همدا راز د اطلاعاتو او کلتور رياست له لوري د زرنج ښار له يو شمېر يوټيوبرانو سره د همږغۍ او اړيکو د پياوړتيا، د اصولي کړنو ترسره کولو او د اسلامي امارت له نشراتي پاليسۍ سره د سمو نشراتو د ترسره کولو په اړه ناسته وشوه.
د اطلاعاتو آمر د يوټيوب چينلونو له مسؤلينو وغوښتل ترڅو د طرزالعمل سره سم د اطلاعاتو او کلتور وزارت څخه د فعاليت جوازونه ترلاسه او د اسلامي امارت د نشراتي پاليسۍ او ژورنالیستکي اصولو پراساس ولسونو ته نشراتي خدمات وړاندې کړي.
د يوټيوب چينلونو مسؤلينو هم خپلې ستونزې او وړانديزونه شریک کړل، چې د اطلاعاتو او کلتور رياست د مسؤلينو له لوري د اصولو په پام کې نیولو سره د حل ډاډ ورکړل شو.

۱۴۴۶/۹/۲ ق
۱۴۰۳/۱۲/۱۲ ل