لوګر کې د څرخ ولسوالۍ شهیدانو د کارنامو را تولولو په اړه غونډه جوړه شوه
د لوګر ولايت د اطلاعاتو او کلتور ریاست له لوري د څرخ ولسوالۍ د شهيدانو د کارنامو او خدمتونو را ټولولو په اړه غونډه جوړه شوه.
غونډې ته د وينا پرمهال د اطلاعاتو او کلتور رئیس دوکتور رفیع الله صمیم وویل: د تېر جهادي بهیر د یادښتونو ساتلو لپاره د منظمو معلوماتو راټولو لړۍ روانه ده، تر څنګ يې د لوګر د جهادي موزیم جوړولو لپاره هم هڅې روانې دي، مجاهدین دې د دغه موزیم په بډایه کولو کې زموږ سره همکاري وکړي.
د یادونې وړ ده، چې څه موده وړاندې د اسلامي امارت له لوري د اطلاعاتو او کلتور وزارت تر چتر لاندې د جهادي ارزښتونو د ساتنې لوی رياست تاسيس شو، ترڅو په ټول هېواد کې جهادي موزيمونه جوړ او د انګريزانو، شوروي ښکيلاک او امريکايي اشغال پر وړاندې د ترسره شويو جهادونو آثار پکښې خوندي کړل شي، همدا راز د شهيدانو سوانح، مېړانې او سرښندنې، ياداښتونه او کارنامې راټولې او په ليکلې، تصويري او ويډيويي بڼه يې وساتي، تر څو راتلونکي نسلونو ته د يوه زرين تاريخ په توګه ورسيږي، یاد رياست په هر ولايت کې په خپله استازولۍ امریتونه او مدیریتونه لري، چې له ولاياتو پورته ذکر شوي موارد راټول او په ولايتي جهادي موزيمونو کې يې خوندي کړي.
ددې ترڅنګ د شهیدانو سوانح مرکز ته را لیږي چې دلته بیا په منظم شکل ترتیب کیږي او ارشیف کې خوندي ساتل کیږي.
۱۴۴۶/۱۰/۲۹ ق
