فاریاب کې لسګونه ځوانان د ښې ویناوالۍ له دوه میاشتني پروګرام څخه فارغ شول
د فاریاب ولایت د اطلاعاتو او کلتور ریاست له وړیا ښونیز مرکز څخه ۸۰ تنه ځوانان د ښې ویناوالۍ له دوه میاشتني پروګرام څخه فارغ شول، چې موخه یې د ځوان نسل د روزنه، د وينا کولو په برخه کې د دوی د مهارت لوړولو او په فرهنګي پروګرامونو کې فعاله ګډون کول و.
د ځوانانو چارو آمر په ټولنه کې د ځوانانو رول ته په اشارې وویل: د اطلاعاتو او کلتور رياست ژمن دی، چې د ښوونيزو او فرهنګي پروګرامونو په برابرولو سره، ځوانانو ته د فکري روزنې او بېلابېلو مهارتي زده کړو زمينه برابره کړي، ځکه ځوانان د ټولنې د ملا د تیر حیثت لري او پر دوی پانګونه د هېواد پر راتلونکي پانګونه ده.
نوموړي زیاته کړه؛ چې د داسې پروګرامونو په برابرولو سره، ځوانان کولای شي په خپل ځان باور پیدا او د يو باخبره او اغیزمن شخص په توګه په بېلابېلو ټولنيزو او کلتوري برخو کې رغنده رول ولوبوي.
فارغ شویو ځوانانو د اطلاعاتو او کلتور ریاست څخه د مننې ترڅنګ په راتلونکي کې د ورته نورو پروګرامونو جوړولو غوښتنه وکړه.
۱۴۴۶/۱۱/۳۰ هـ. ق
