د مطالعې کلتور د ترویج روزنیز سیمینار ترسره شو

د اطلاعاتو او کلتور وزارت د عامه کتابتونونو ریاست د ننګرهار اطلاعاتو او کلتور ریاست ښوونیز مرکز کې ګڼ شمېر ځوانانو ته د مطالعې کلتور د ترویج تر عنوان لاندې یو ورځنی روزنیز سیمینار وړاندې کړ.
دعامه کتابتونونو رئیس دوکتور رفیع الله صمیم د مطالعې پر اهمیت او ګټو خبرې وکړې او ویې ویل: که غواړو هېواد مو پرمختګ وکړي او د پردیو له ناوړه اغېزو څخه خوندي پاتې شو، نو اړینه ده، چې ټولنه کې مو د مطالعې کلتور عام کړو او ټول باید په ګډه د مطالعې کلتور عام کولو په موخه کار وکړو.
د ښاغلي صمیم په وینا دا مهال د اطلاعاتو او کلتور وزارت تر چتر لاندې په ټول هېواد کې ۱۰۹ عامه کتابتونونه فعال دي او هڅې روانې دي، چې دا کتابتونونه لا معیاري شي.
دغه راز د ننګرهار د اطلاعاتو او کلتور رئیس مولوي ذبیح الله نوراني ټینګار وکړ، چې مطالعه د ملت د فکري ودې، علمي ځواکمنتیا او روښانه راتلونکي بنسټ جوړوي. 
ښاغلي نوراني  ځوانان وهڅول، چې کتاب د ژوند نه بېلېدونکی ملګری وګرځوي.

۱۴۴۷/۷/۲۲هـ ق