د غزني د اطلاعاتو او کلتور رئیس د سلطان شهاب الدین غوري له مقبرې ليدنه وکړه
تېره ورځ د غزني د اطلاعاتو او کلتور رئیس ملا حمیدالله نثار چې د ده یک ولسوالۍ ولسوال مولوي عبدالله احسان آخندزاده یې ملتیا کوله د ده یک ولسوالۍ په ده یک کلي کې د سلطان شهاب الدین غوري له مقبرې لیدنه وکړه.
د یادې لیدنې اصلي موخه د سلطان شهاب الدین غوري د مقبرې وضعیت څېړل او په راتلوونکي کې د بیارغونې په موخه د سیمې له خلکو سره مشورې شریکول وه.
د اطلاعاتو او کلتور رئیس ملا حمیدالله نثار د خپل سفر په لړ کې د ده یک کلي له یو شمېر قومي مخورو او اوسېدونکو سره هم وکتل او له هغوی یې د سلطان شهاب الدین غوري مقبرې په بیارغونې او ساتنه کې د همکارۍ غوښتنه وکړه.
په ورته وخت کې د ده یک کلي قومي مخورو او اوسېدونکو له اطلاعاتو او کلتور ریاست سره د بشپړې همکارۍ ژمنه وکړه او زیاته یې کړه، چې له پخوا راهیسې د یاد کلي اوسېدونکو د سلطان شهاب الدین غوري مقبرې په بیارغونې او ساتنه کې فعاله برخه اخیستې ده.
۱۴۴۵/۵/۵ هـ ق
۱۴۰۲/۸/۲۸ هـ ش
