د سیاحتي، زیارتي، حج او عمرې شرکتونو د اتحادیې مسئولینو خپلې غوښتنې د ګرځندوی، مالي او اداري چارو له معین سره شریکې کړې

د افغانستان د سیاحتي، زیارتي، حج او عمرې شرکتونو د اتحادیې د رئیس محمد ګلاب سلطان زوی په مشرۍ د دغې اتحادیې مسئولینو د اطلاعاتو او فرهنګ وزارت د ګرځندوی، مالي او اداري چارو له معین مولوي قدرت الله جمال سره په لیدنه کې خپلې غوښتنې او وړاندیزونه شریک کړل.
د لیدنې په پیل کې د یادې اتحادیې مسئولینو چې د کابل په ګډون له کندهار، ننګرهار، خوست، جوزجان، سرپل او فراه ولایتونو څخه راغلي وو، د اتحادیې غوښتنو ته د رسیدنې، ملاتړ او د لازمو اسانتیاوو د برابرولو په موخه له اطلاعاتو او فرهنګ وزارت څخه مننه وکړه.
دوی همدارنګه د مالیاتو د ورکړې، خدماتي فیس، جوازونو د وېش او نورو برخو کې د اتحادیې یو لړ غوښتنې او وړاندیزونه شریک کړل او د وزارت او نورو اړوندو امارتي ادارو له لوري یې د رسیدنې غوښتنه وکړه، یادو مسئولینو ژمنه وکړه، چې د خپلو شرکتونو د خدمتونو د ښه والي او لا معیاري کېدو لپاره به هڅې وکړي.
ورته مهال د ګرځندوی، مالي او اداري چارو معین، د افغانستان د سیاحتي، زیارتي، حج او عمرې شرکتونو اتحادیې د مسئولینو غوښتنو او وړاندیزونو اورېدو ترڅنګ ډاډ څرګند کړ، چې غوښتنې او وړاندیزونه به یې د اړوندو امارتي ادارو له مسؤلینو سره شریکې کړي.
ښاغلي جمال صاحب په هېواد کې د سیاحتي، زیارتي، حج او عمرې شرکتونو له لوري د باکیفیته او معیاري خدمتونو پر وړاندې کولو ټینګار وکړ او یادونه یې وکړه، چې د افغانستان اسلامي امارت په ځانګړې توګه د اطلاعاتو او فرهنګ وزارت د یادو شرکتونو د فعالیتونو ملاتړ کوي او اړینې اسانتیاوې ورته برابروي.
د لیدنې په پای کې، د سیاحتي، زیارتي، حج او عمرې شرکتونو مسئولینو ته یو لړ سپارښتنې وشوې او د هېواد د ګرځندوی سکتور د پیاوړتیا او پراختیا لپاره د دغه شان ناستو پر دوام ټینګار وشو.