د جبلالسراج ولسوالۍ کې د حقالمبین کتاب ازموينې غوره ګډونوال وستایل شول
د پروان ولايت په جبل السراج ولسوالۍ کې د اطلاعاتو او کلتور او پوهنې رياستونو په همکارۍ د تنوير فکري او کلتوري ادارې له لوري په حق المبين کتاب کې سيالي ترسره شوې وه، چې پايلې يې اعلان او غوره ګډونوال يې په ډاليو ورکولو سره ونازول شول.
د اطلاعاتو او کلتور رئیس مولوي شمس الحق صدیقي د مطالعې، علم او پوهې پر ارزښت خبرې وکړې او ویې ویل: په سيالۍ کې ګډون او لیوالتیا د علم او پوهې سره ستاسو د مینې څرګندونه کوي، د اطلاعاتو او کلتور ریاست همېشه هڅه کوي، چې د استعدادونو د ودې، د مطالعې او کتاب لوستنې د کلتور د پراخېدو لپاره دا ډول سيالۍ تنظیم کړي، ترڅو د ځوانانو د پوهې کچه لوړه شي.
نوموړي اوسنی نظام یو شرعي او اسلامي نظام یاد کړ او له خلکو یې وغوښتل، چې د اسلام د پرمختګ او ودې لپاره له دې نظام څخه ملاتړ وکړي.
د یادونې وړ ده، چې د ازموینې لومړي مقام ګټونکي ته یو پايه کمپیوټر، دویم مقام ګټونکي ته یو ځيرک موبایل، درېیم مقام ګټونکي ته د الفجر ساعت، او له څلورم مقامه تر شلم پورې ګډونوالو ته نغدي ډالۍ ورکړل شوې.
۱۴۴۶/۸/۷ ق
۱۴۰۳/۱۱/۱۸ ل
