د بدخشان د کشم ولسوالۍ له عامه کتابتون څخه ليدنه وشوه
د بدخشان ولايت د اطلاعاتو او کلتور رياست مسؤلينو د مطالعې د ودې او کتابخانو ته د ځوانانو د لاسرسي په موخه د کشم ولسوالۍ له عامه کتابتون څخه ليدنه وکړه.
د کلتور او هنر آمر محمد عارف فاروقي وويل: د اطلاعاتو او کلتور رياست د څېړنې ټيم د يو سفر په ترڅ کې د کشم ولسوالۍ له عامه کتابتون څخه د ليدنې په ترڅ کې پوه شول چې د ياد کتابتون لپاره د مناسب ځای نشتون د دې لامل شوی چې ځوانان د خپلې خوښۍ کتابونو له مطالعې څخه پاتې شي.
د نوموړي په وينا ياد ټيم د کشم ولسوالۍ له ولسوال قاري محمد اصف ظفريار سره د يادې ستونزې په اړه ناسته کړې، چې د ولسوال له لوري ورسره د مناسب ځای د پيدا کولو ژمنه وشوه.
د بدخشان ولايت د عامه کتابخانو عمومي مدير محمد عثمان ابراهيمي وايي: په تېرو څو مياشتو کې يې په مرکز او ولسواليو کې د ځوانانو ترمنځ د مطالعې دود د غښتلي کولو په موخه د کتاب لوستنې څو پروګرامونه جوړ کړي دي، دا مهال په بدخشان کې ځوان نسل ورځ تر بلې د مطالعې سره علاقه پيدا کوي او په کتابخانو کې يې د ګډون کچه لوړه شوې ده.
۱۴۴۵/۶/۱۸ هـ ق
۱۴۰۲/۱۰/۱۰ هـ ش
