د بامیانو ولایت له دوو لرغونو سیمو څخه لیدنه وشوه

د بامیانو ولایت د اطلاعاتو او کلتور رئیس قاري سید مصطفی هاشمي د یو هیئت په مشرۍ د دې ولایت د مرکز توپچي کلي کې له کافر کلا (الف او ب) څخه لیدنه وکړه.
د اطلاعاتو او کلتور رئیس د دې سفر موخه د تاریخي او فرهنګي میراثونو د وضعیت څارنه، د سیمې عمومي ارزونه، او دغه لرغونې سیمې ته د ګرځندویانو را جلب کول وبلل.
ښاغلي صالح دا دوه کلاګانې د بامیانو د بډایه تاریخي میراث مهمې برخې وبللې او ویې ویل: دا تاریخي ودانۍ د ولایت له ارزښتناکو خو لږ پېژندل شویو جاذبو څخه شمېرل کېږي.
نوموړي د کافر کلا (الف او ب) د سیمې له اوسېدونکو څخه وغوښتل، چې د دغو تاریخي سیمو په ساتنه او پالنه کې خپل مسؤلیت ترسره کړي.
کافر کلا (الف او ب) د بامیانو ولایت د نورو تاریخي او لرغونو سیمو په څېر د دې ولایت له تر ټولو پخوانیو او مهمو تاریخي آثارو څخه ده، چې د توپچي کلي پر یوه ډبرینې غونډۍ جوړه شوې ده.
یاده کلا له خښتو او ډبرو جوړه شوې او د شاوخوا دښتو یوه زړه‌ راښکونکې منظره وړاندې کوي، دغه ستراتیژیک موقعیت ښيي چې دا کلاوې په پخوا وختونو کې د ضحاک او غلغلې لرغونو ښارونو ترمنځ د دفاع او څار مهم رول درلود.
د یادونې وړ ده، چې دا کلاګانې په ۲۰۰۳ میلادي کال کې د ملګرو ملتونو د علمي، کلتوري او ښوونیز سازمان (یونیسکو) دایمي لست ته هم ور اضافه شوې ده.

۱۴۴۶/۱۱/۱۰ هـ ق