د اطلاعاتو او کلتور ریاست د کتاب لوستنې دود ته ځانګړې پاملرنه لري
د کندوز ولايت د اطلاعاتو او کلتور رياست مسؤلين وايي: دې ولايت کې د کتاب لوستنې دود ته ځانګړې پاملرنه شوې ده او لا هم هڅې روانې دي، چې د کتاب لوستنې دود نور هم پياوړی شي.
په همدې موخه د اطلاعاتو او کلتور رئيس مولوي ګل محمد الیاس د امام صاحب ولسوالۍ د عامه کتابتون څخه د ليدنې په موخه يادې ولسوالۍ ته سفر وکړ او له ياد کتابتون څخه يې ليدنه او هر اړخيزه څارنه وکړه.
ښاغلي الیاس په دې لیدنه کې د عامه کتابتون له مسؤلینو غوښتنه وکړه، چې ولسونه نه یوازې کتاب لوستلو ته وهڅوي، بلکې هغوی ته عامه پوهاوی ورکړي، ترڅو د کتاب له مطالعې سره علاقه پیدا کړي.
د يادونې وړ ده، چې څه موده وړاندې د اطلاعاتو او کلتور وزارت اړوند د عامه کتابتونونو رياست له لوري د کندوز ولايت له عامه کتابتونونو سره د شاوخوا ۵۰۰ ټوکو کتابونو مرسته شوې وه، چې د اطلاعاتو او کلتور رياست له لوري په دې ولايت کې په فعالو دريو عامه کتابتونونو ووېشل شول.
۱۴۴۶/۷/۲۶ ق
۱۴۰۳/۱۱/۸ ل
