اطلاعاتو او کلتور وزارت کې د افغان ټکنالوژۍ انسټيټيوټ محصلينو ته ښوونيزه دوره پای ته ورسېده

د اطلاعاتو او کلتور وزارت د بشري سرچينو رياست له لوري د تخنيکي او مسلکي زده کړو ادارې اړوند د افعان ټکنالوژۍ انسټيټيوټ ۲۳ تنو محصلينو ته له ادارې سره د بلدتيا او په نظري او عملي ډول د اداري کارونو د زده کړې يوه مياشتنۍ دوره پای ته ورسېده او د يوې غونډې په ترڅ کې محصلينو ته تصديق پاڼې ووېشل شوې.
یاده غونډه کې د اطلاعاتو او کلتور وزارت د ګرځندوی، مالي او اداري چارو معين مولوي قدرت الله جمال، د بشري سرچينو رئيس مولوي نقیب الله نعمان، د ګرځندوی د پراختيا رياست رئيس مولوي محمد صادق  او د ادارې د پراختيا او ظرفیت لوړونې آمر محمد عيسی خاطرزي ګډون کړی وو.

د ګرځندوی، مالي او اداري چارو معين ښاغلي جمال د خپلو خبرو په ترڅ کې د بشري سرچينو رياست څخه مننه وکړه، چې په اداره کې دا ډول نوښتونه رامنځته کوي او د هيواد ځوانانو ته د زده کړو زمينه برابروي، نوموړي محصلينو ته په خطاب کې وويل: تاسو ځوانان د هيواد راتلونکي رهبران ياست، ځانته لوړ اهداف وټاکئ او د ژوند هره برخه کې له اخلاص څخه کار واخلئ، له وخت نه په ښه توګه استفاده وکړئ، چې د هيواد د خدمت جوګه شئ.
د بشري سرچينو رياست رئيس مولوي نقیب الله نعمان وويل: د اطلاعاتو او کلتور وزارت د بشري سرچينو رياست د روان کال په ترڅ کې د ادارې د پراختيا او ظرفیت لوړونې په موخه بېلابېل ښوونيز پروګرامونه ترسره کړي، چې له جملې يې د وزارت کارکوونکو ته د پروژې او پروپوزل ليکنې ښوونيز سمينار چې د وزارت ۴۰ تنو آمرينو او مديرانو په کې ګډون کړی و، د کاري چاپيريال پېژندنې دوه ښوونيز سمينارونه چې نوي مقرر شويو کارکوونکو ته ترسره شو، د مديريت د اساساتو ښوونيز سمينار چې د وزارت د مختلفو رياستونو کارکوونکو په کې ګډون کړی و، په سلام پوهنتون کې د کمپيوټر او ګرافیک ډيزاين په برخه کې د ۳۰ تنو کارکوونکو روزل، همدا راز د ملکي خدمتونو په انسټيټيوټ کې د وزارت ۴۰ تنو کارکوونکو ته د زده کړو زمينه برابرول، تر څنګ يې د ګرځندوی، مالي او اداري چارو معينيت لخوا د (PTS)  نړيوال ښوونيز سازمان له لوري د وزارت ۴۰ تنو کارکوونکو ته د ګرځندوی، هوټلدارۍ او انګليسي ژبې زده کړې په موخه د دريو اونيو لپاره ښوونيز پروګرام، چين هيواد ته د لنډ مهالې ښوونيزې برنامې لپاره د وزارت د ۳۶ تنو کارکوونکو استول يادولی شو، تر څنګ يې د تخنيکي او مسلکي زده کړو د افغان ټکنالوژۍ انسټيټيوټ ۲۳ تنو محصلينو ته له ادارې سره د بلدتيا او په نظري او عملي ډول د اداري کارونو د زده کړې يوه مياشتنۍ دوره شروع کړې وه، چې نن پای ته ورسېده.
د افغان ټکنالوژۍ انسټيټيوټ د محصلينو په استازيتوب سید موسی هاشمي د اطلاعاتو او کلتور وزارت له مشرتابه څخه مننه وکړه، چې دوی ته يې د عملي او نظري زده کړو زمينه برابره کړې وه.
د غونډې په پای کې د ګرځندوی، مالي او اداري چارو معين مولوي قدرت الله جمال، د بشري سرچينو رئيس مولوي نقیب الله نعمان او د ګرځندوی د پراختيا رياست رئيس مولوي محمد صادق په لاسونو محصلينو ته تصديق پاڼې وويشل شوې.
غونډه د دعايې په لوستلو پای ته ورسېده.

۱۴۴۶/۴/۱۹ هـ ق
۱۴۰۳/۸/۱ هـ ل