«کتاب د ټولو لپاره» تر عنوان لاندې غونډه جوړه شوه
د چهارشنبې ورځ ( ۲ ذوالقعده الحرام ۱۴۴۶) د اطلاعاتو او کلتور وزارت د فرهنګ او هنر معینیت د عامه کتابتونونو ریاست له لوري ( کتاب د ټولو لپاره) تر عنوان لاندې د غوره لیکوالانو د ستاینې او هڅونې په موخه د سمع او بصر ریاست په تالار کې غونډه جوړه شوه.
په دې ناسته کې د خپرونو چارو معین مهاجر فراهی، د فرهنګ او هنر معین مولوي عتیق الله عزیزي، د ځوانانو معین قاري محمد یونس راشد، د ارشاد، حج او اوقافو وزارت مسلکي معین مولوي زر محمد حقاني، د عامه کتابتونونو رئیس حافظ نعمت الله منتظر، د هنرستان رئیس مفتي لعل محمد منیب، د اطلاعاتو او کلتور وزارت ویاند خبیب غفران، د کاپي رایټ آمر مولوي عبدالحق حماد، د امارتي ادارو مسوولینو، لیکوالانو، خبریالانو او د رسنیو استازو ګډون کړی و.
په پیل کې د عامه کتابتونونو رئیس حافظ نعمت الله منتظر د ناستې ګډونوالو ته د ښه راغلاست ترڅنګ د کتاب، مطالعې او د کتاب لوستنې د فرهنګ د پراخوالي په ارزښت خبرې وکړې او زیاته یې کړه چې دا ناسته د ۱۴۰۳ لمریز کال د غوره لیکوالانو د ستاینې او هڅونې په موخه جوړه شوې ده.
ورپسې د فرهنګ او هنر معین مولوي عتیق الله عزیزی وویل چې کتاب ډېر ارزښت لري او باید کار ورته وشي، د کتاب مطالعې ته دیني، انساني او ټولنیزه اړتیا ده، اسلامي امارت تل له لیکوالانو ملاتړ کړی دی؛ ښاغلي عزیزي له لیکوالانو وغوښتل ترڅو داسې لیکنې وکړي چې تلپاتې وي، همدارنګه عام فهم او ګټور کتابونه ولیکي او د مطالعې فرهنګ لپاره هڅې وکړي.
د خپرونو چارو معین مهاجر فراهي هم د مطالعې او کتاب لوستنې رول مهم وباله او زیاته یې کړه: لکه څنګه چې د انسان بدن خوړو ته اړتیا لري، ذهن هم مطالعې ته اړتیا لري؛ ښاغلي مهاجر وویل باید داسې کتابونه ولوستل شي چې ګټور وي او اغېز ولري او لیکوال باید د ټولنې د اړتیاوو پر بنسټ کتابونه ولیکي.
د ځوانانو چارو معین قاري محمد یونس راشد کتاب ته د استاد حیثیت ورکړ، ویې ویل چې د کتاب په مطالعې کې باید احتیاط وشي، ځکه د بېلابېلو کتابونو آزاده مطالعه ځوانان منحرفوي؛ ښاغلي راشد وویل په تېرو شلو کلونو کې د ځوانانو ذهنونه د لوېدیځو افکارو تر اغېز لاندې راغلي او د فکري اصلاح لپاره باید هڅې ډېرې شي.
همدارنګه د ارشاد، حج او اوقافو وزارت مسلکي معین مولوي زر محمد حقاني او د اطلاعاتو او کلتور وزارت د کاپيرايټ آمر مولوي عبدالحق حماد هم د خپلو خبرو په لړ کې د کتابونو پر ارزښت خبرې وکړې او د کتاب لیکنه او مطالعه یې د ټولنې یوه مهمه اړتیا وبلله.
غونډه د تیاتر ټیم د تمثیلي ټوټې په اجرا سره چې موضوع یې د کتاب مطالعې ارزښت او ناسم رواجونه وو، د ۱۴۰۳ کال د غوره لیکوالانو د ستاینلیکونو په وېش او دعا سره پای ته ورسېده.
