د ګرځندوی، مالي او اداري معینیت پلاوي سمنګان ولایت ته د سیاحتي او تاريخي سيمو د ارزونې په موخه سفر وکړ
د اطلاعاتو او فرهنګ وزارت د ګرځندوی، مالي او اداري معینیت پلاوي سمنګان ولایت ته د سفر په ترڅ کې د دغه ولایت د اطلاعاتو او فرهنګ ریاست سره په همغږۍ د رستم تخت له تاریخي سیمې څخه لیدنه وکړه.
د پلاوي مشر او د ګرځندوی، مالي او اداري معينيت مشاور سعدالله اسد وویل: د اطلاعاتو او فرهنګ وزارت هڅه کوي، چې په دغه سیمه کې د سیلانیانو لپاره اړینې اسانتیاوې برابرې کړي، په پلان کې ده چې د جامع جومات ترڅنګ په غره کې د مغارو په شکل جوړ شوي دوکانونه د لاسي صنایعو د پلور لپاره فعال شي، همداراز، د رستم تخت مخې ته د بیرغ ستنې درول، د دواړو غرونو ترمنځ د کیبلي زانګوګانو جوړول او د نورو اړینو اسانتیاوو برابرول هم په پام کې نیول شوي دي.
د ګرځندوی، مالي او اداري مشاور سعدالله اسد په مشرۍ پلاوي د سفر په دوام د خُلم ولسوالۍ د جهان نما بڼ او ماڼۍ څخه هم لیدنه وکړه او ویې ویل: د اطلاعاتو او فرهنګ وزارت به د جهان نما ماڼۍ د بیارغولو، د بڼ د ساتنې او سمسورتیا او د حوض جوړولو چارې ترسره کړي او د سیلانیانو لپاره د فوټبال او والیبال میدانونو، د ماشومانو د تفریح ځانګړې ساحې او جامع جومات جوړول هم د یادې سیمې د پراختیا په پلانونو کې شامل دي.
د یادونې وړ ده، چې د دغه سفر موخه د سمنګان ولایت د تاریخي او سیاحتي سیمو ارزونه، د تاریخي آبداتو د ساتنې او پالنې لپاره د اړینو اسانتیاوو پېژندل او د سیاحتي سیمو د پراختیا لپاره د شته امکاناتو ارزول وو.
۱۴۴۸/۵/۱۷ هـ ق
