د فرهنګ او هنر معین د فیروزکوه مؤسسې له عمومي رئیسې سره وکتل
د اطلاعاتو او فرهنګ وزارت د فرهنګ او هنر معین شیخ عبدالرحمن طیبي، د افغانستان لپاره د فیروزکوه مؤسسې له عمومي رئیسې مېرمن لیان او ورسره مل پلاوي سره وکتل.
په دې کتنه کې چې د بهرنیو اړیکو او فرهنګي اتشو رئیس محمد شفیق احمدزي او د تاریخي آبداتو د ساتنې او ترمیم رئیس انجنیر حسیب نسیمي هم حضور درلود، د افغانستان د فرهنګي میراثونو د ساتنې او بیارغونې، په بامیان ولایت کې د شش پل کاروان سرای د بیارغونې د پروژې او د اطلاعاتو او فرهنګ وزارت او فیروزکوه مؤسسې ترمنځ د همکاریو د پراختیا په اړه خبرې وشوې.
په پیل کې مېرمن لیان د فیروزکوه مؤسسې د فعالیتونو او روزنیزو پروګرامونو په اړه معلومات وړاندې کړل.
نوموړې وویل: فیروزکوه موسسې په ۲۰۰۶ میلادي کال کې د کابل ښار په تاریخي مرادخاني سیمه کې رامنځته شوې فرهنګي او روزنیزه مؤسسه ده، چې د افغانستان د دودیزو هنرونو د بیا راژوندي کولو، د کلاسیکې افغاني معمارۍ د ساتنې او د تاریخي سیمو د بیارغونې په برخو کې فعالیت کوي، د فیروزکوه د هنرونو او افغان معمارۍ انسیټیټوټ په ۲۰۱۱ میلادي کال کې د یوه رسمي روزنیز بنسټ په توګه ثبت شوی او د نجارۍ او کندنې، ګاڼو جوړونې، سفالګرۍ، خطاطۍ او میناتورۍ په برخو کې درې کلنې مسلکي زدهکړې وړاندې کوي.
نوموړې همداراز د بامیان ولایت د شش پل کاروان سرای د بیارغونې په اړه معلومات ورکړل او ویې ویل: د دې تاریخي ودانۍ د بیارغونې لومړی پړاو بشپړ شوی او ټاکل شوې چې د تمویل کوونکو د مالي مرستو په برابرېدو سره یې دویم پړاو هم پیل شي.
وروسته د اطلاعاتو او فرهنګ وزارت د فرهنګ او هنر معین شیخ عبدالرحمن طیبي د فیروزکوه مؤسسې فعالیتونه وستایل او ویې ویل: افغانستان لرغونی تاریخ او بډایه فرهنګي میراث لري، چې ساتنه او پالنه یې ګډ مسئولیت دی.
نوموړي وویل: د تېرو پنځو لسیزو جګړو د هېواد پر فرهنګي میراثونو ناوړه اغېزه کړې او ګڼ شمېر تاریخي آثار او لرغوني ځایونه زیانمن شوي دي.
ښاغلي طیبي د شش پل کاروان سرای د بیارغونې پروژه د فرهنګي میراثونو د ساتنې په برخه کې مهمه وبلله او ویې ویل: د دې تاریخي ودانۍ ترمیم به د لا ډېرو ویجاړیو مخه ونیسي او د سیمې د تاریخي ارزښتونو په ساتنه کې به مرسته وکړي، د دې کاروان سرای بیارغونه کولای شي د کورنیو او بهرنیو سیلانیانو د جذب ترڅنګ، د سیمې د اوسېدونکو لپاره د کار او عاید زمینه برابره او د لاسي صنایعو او دودیزو هنرونو د ودې لپاره فرصت رامنځته کړي.
د فرهنګ او هنر معین د فیروزکوه مؤسسې او د اطلاعاتو او فرهنګ وزارت د اړوندو ریاستونو ترمنځ د همکاریو پر دوام ټینګار وکړ او ویې ویل: د فرهنګي میراثونو د ساتنې لپاره باید همغږي او ګډ کار لا پیاوړی شي.
نوموړي ډاډ څرګند کړ، چې د اطلاعاتو او فرهنګ وزارت به د خپلو امکاناتو په چوکاټ کې د فیروزکوه مؤسسې د فعالیتونو د لا ښه تنظیم او د ستونزو د حل په برخه کې لازمې همکارۍ وکړي.
په پای کې دواړو لورو د افغانستان د فرهنګي میراثونو د ساتنې، تاریخي آبداتو د بیارغونې او د فرهنګي او هنري همکاریو د پراختیا په برخه کې د ګډو هڅو پر دوام ټینګار وکړ.
١٤٤٨/٣/٢٢ ه ق
