غور کې د (غنم ګل) په نوم مشاعره ترسره شوه

د غور ولایت د اطلاعاتو او فرهنګ ریاست، د شعر او ادب د درناوي، د فرهنګي شتمنیو د پیاوړتیا او د بزګرانو د ملاتړ په موخه د (غنم ګل) په نوم مشاعره ترسره کړه، چې پکې د سیمه‌ییزو ادارو مسوولینو، علماوو کرامو، شاعرانو، ادیبانو، لیکوالانو او ځوانانو ګډون کړی و.
د غور د اطلاعاتو او فرهنګ رییس مولوي عبدالحی زعیم وویل: په دغه ولایت کې د لومړي ځل لپاره د (غنم ګل) په نوم فرهنګي مشاعره ترسره شوه، چې په لړ کې یې د غور ولایت شاعرانو، ادیبانو او لیکوالانو د شعر او ادب په ژبه د دغه ولایت د بزګرانو د کرنیزو محصولاتو د ارزښتونو په اړه خبرې وکړې او خپلې ادبي او شعري پنځونې یې وړاندې کړې.
ښاغلي زعیم زیاته کړه، چې د هېواد په نورو ولایتونو کې هم د مهمو کرنیزو محصولاتو په اړه بېلابېل فرهنګي پروګرامونه جوړېږي، چې دا د فرهنګیانو ترمنځ د لا ډېر انسجام او یووالي زمینه برابروي او همدارنګه شاعران او ادیبان کولای شي د خپلو شعرونو او ادبي اثارو له لارې د خپل ولایت د بزګرانو د محصولاتو ګټې او ارزښتونه را منعکس کړي.
ادیبانو او شاعرانو د دغه ډول پروګرامونو د جوړېدو هرکلی وکړ او د غور ولایت د کرنیزو محصولاتو د ارزښتونو او لاسته راوړنو په انعکاس کې یې اغیزمن وباله او په راتلونکي کې یې د ورته پروګرامونو د دوام غوښتنه هم وکړه.
د یادونې وړ ده، چې دغه پروګرام د لومړي ځل لپاره د غور ولایت د اطلاعاتو او فرهنګ ریاست په نوښت په دغه ولایت کې جوړ شوی، چې په کې د شعر، نعت او ترانو له لارې د بزګرانو د محصولاتو ګټې او ارزښتونه بیان شول.

۱۴۴۸/۴/۲۳ هـ ق