د اطلاعاتو او کلتور رئیس حضرت سلطان ولسوالۍ ته سفر وکړ
د سمنګان ولایت د اطلاعاتو او کلتور رياست رئیس مولوي فیروزالدین منیب د حضرت سلطان ولسوالۍ کوکجر سیمې ته د هزار سم کوکجر تاریخي ځمکو د بیرته اخیستو لپاره د اړینو اقداماتو د څارنې په موخه سفر وکړ.
دغه ځمکې چې ۳۳۵ هکتاره مساحت لري، پخوا د هیواد د لرغونو آبدو او کلتوري میراثونو برخه ګڼل کېدې، خو د کلونو په تېرېدو له بده مرغه د دغو ځمکو ځینې برخې د سیمې د خلکو لخوا غصب شوې وې او دوی خپلو منځونو کې وېشلې وې.
د دې سفر په ترڅ کې د سمنګان د اطلاعاتو او کلتور رئیس هغه کسان چې په غیر قانوني توګه یې په دې تاریخي سیمه کې د کورونو جوړول پیل کړي وو، له ودانۍ منع کړل.
دا په داسې حال کې ده چې هزار سم کوکجر د سمنګان ولایت یوه ډېره مهمه لرغونې او کلتوري سیمه ده چې تاریخ یې زرګونو کلونو ته رسېږي، دا سیمه د تاريخ په اوږدو کې د بېلابېلو قومونو د استوګنې او کلتوري او سوداګریزو فعالیتونو ځای و، په دې سیمه کې د بېلابېلو دورو ګڼ شمېر تاریخي آثار هم موندل شوي دي.
له همدې امله د دې ځمکو ساتنه نه یوازې د لرغونو آبدو ساتنه، بلکې د سیمې د خلکو د کلتوري او تاریخي هویت ساتنه هم ګڼل کېږي.
۱۴۴۶/۷/۱۳ ق
۱۴۰۳/۱۰/۲۴ ل
