په غزني کې د امارت پېژندنې سیالۍ پایلې اعلان شوې
په غزني ولايت کې د اطلاعاتو او کلتور ریاست له لوري د امارت پېژندنې سترې سيالۍ پایلې د ځانګړو مراسمو په ترڅ کې اعلان او غوره ګډونوالو ته جایزې ورکړل شوې.
یاده غونډه د غزني ولایت مقام په تالار کې جوړه شوې وه، چې پکښې د سیمه ییزې ادارې یو شمېر مسؤلینو، دیني علماوو او د سیالۍ ګډونوالو ګډون درلود.
دغه ازموینه د لیندۍ په ۲۲مه نېټه د غزني د اطلاعاتو او کلتور ریاست له لوري ترسره شوې وه، چې د بېلابېلو امارتي او خصوصي ښوونځیو زده کوونکو پکښې ګډون کړی و.
د غزني د اطلاعاتو او کلتور رئیس ملا حمیدالله نثار د خپلې وینا پر مهال وویل: په دې سیالۍ کې شاوخوا ۶۰۰ کسانو ګډون کړی و، چې پایلې یې په بشپړ شفافیت اعلان شوې، نوموړي د ګټونکو ګډونوالو د هڅو ستاینه وکړه او له ځوانانو یې وغوښتل چې د زده کړو او مطالعې په برخه کې لا زیاتې هڅې وکړي.
ددې سيالۍ لومړي مقام ګټونکي ته ۲۰ زره افغانۍ، دویم مقام ګټونکي ته ۱۰ زره افغانۍ، دریم مقام ګټونکي ته کمپیوټر، څلورم مقام ګټونکي ته بایسیکل او تر لسم مقام پورې ګډونوالو ته بېلابېلې جایزې ورکړل شوې.
۱۴۴۶/۶/۲۲ هـ ق
۱۴۰۳/۱۰/۴ هـ ل
