د هېواد په ټولو ولایتونو کې د امیرالمومنین حفظه الله اختریز پیغامونه وویشل شول او رسنیو سره د اختریزو خپرونو جوړولو په اړه ناستې وشوې
د هېواد په ټولو ولایتونو کې د اطلاعاتو او کلتور ریاستونو له لوري د عالیقدر امیرالمومنین حفظه الله اختریز پیغامونه په ملکي، نظامي ادارو او عامو خلکو د ویشلو ترڅنګ د رسنیو له استازو او خبریالانو سره د غوره اختریزو خپرونو جوړولو په اړه ناستې وشوې.
د یادو ناستو په ترڅ کې د اطلاعاتو او کلتور ریاستونو مسؤلینو د رسنیو استازو او خبریالاتو ته د غوره اختریزو برنامو جوړولو په موخه لازمې سپارښتنې وکړې او له دوی څخه یې وغوښتل، چې د لوی اختر د رارسېدو په مناسبت د تېر په څېر ځانګړې او له پوهاوي ډکې خپرونې جوړې کړي.
د اختريزو ځانګړو خپرونو پر مهال دې رسنۍ د تل په څېر له داسې څه نشرولو ډډه وکړي، چې ټولنه د منکراتو لور ته سوق کوي او له هغو خلکو سره دې مرکې وشي، چې مثبت فکر سره ځوانانو او ټولنې ته ښه پيغام وړاندې کوي.
په ورته وخت کې د رسنيو استازو او خبريالانو د اطلاعاتو او کلتور رياستونو له مسؤلينو څخه د دوامدارو همکاریو په موخه مننه وکړه او ډاډ یې څرګند کړ، چې د تل په څير به د عامه اذهانو او افکارو په روښانولو کې رغنده رول ولوبوي، هېوادوالو او نړیوالو ته به د روانو پرمختګونو او شته فرصتونو انځور په ښه ډول ورسوي.
۱۴۴۶/۱۲/۸ هـ ق
